The Definitive Guide to Living in the Capital , Cairo , Egypt

بسبب صوم رمضان، الجسم بيفقد سوائل كتير، خاصة في درجة الحرارة العالية، وده بيعمل جفاف، وعلشان كده في فترة ما بين الإفطار والسحور لازم نعوض ده، لأن بطبيعة أجسامنا بنحتاج من 3 لـ4 لتر ماء كل يوم. خلال السطور الجاية هنقول لكم على 5 مشروبات صحية في رمضان هتساعدكم تعوضوا النقص الخاص بوقت الصيام، وكمان هيكون ليها فوائد كتير، ولكن متنسوش أن الماء أهم مشروب ولازم نشرب على الأفل 2 لتر يوميًا، وباقي الكمية بتتعوض من خلال الأكل والعصائر.

العرقسوس

اختلفت الآراء حلو طعم العرقسوس وفيه فريقين ما بين محبين وكارهين، ولكن لا يوجد اختلاف بأن العرقسوس هو واحد من أهم المشروبات اللي بتروي العطش وبيساعد على سهولة الهضم وكمان بيرطب الجسم، وله فوائد تانية كتير عظيمة.

قمر الدين

مشروب بيوفر الكالسيوم للجسم بنسبة قليلة ولكن مفيدة، وكمان مفيد لحماية العظام والفم، وفيه نسبة حديد كبيرة، وبيقلل من ارتفاع الكوليسترول، وبينظم ضغط الدم وبيحتوي على البوتاسيوم.

التمر هندي

أولًا، التمر هندي بيكون عبارة عن كور شبه كرة الجولف، أو حبيبات شبيهة للبلح، وبيتنقع في ماء دافئ وبيتشرب بعد 12 ساعة ويفضل من غير سكر، ولكن التمر اللي بيتباع في أكياس وبيبقى بودرة هو مش تمر هندي أساسًا، فياريت تخلوا بالكم علشان الفوائد واللون مختلفين تمامًا.

أما عن فوائد التمر فهي تحسين الهضم، تحسين عملية القلب، تقوية المناعة، تقوية الجهاز العصبي، السيطرة على مرض السكري، وبيحمي من تصلب الشرايين، وبينقص الوزن، وبيقلل فرص الإصابة بالالتهابات، وبيخفف انتفاخات البطن، وبيحمي من مرض السرطان.

الليمون بالنعناع

من المشروبات اللي بتساعد على الهضم، وبيحافظ على توازن عملية الغذاء، ومضاد للالتهابات والميكروبات،وبيعالج قرحة المعدة وبيقوي عضلة القلب، وبينشط الدورة الدموية، وبيعالج قرحة المعدة، وبيحمي من الأمراض الخطيرة للقلب، وكمان بيدوب الدهون في الجسم.

مشروب اللوز

يعتبر من أهم المشروبات اللي بتزود الجسم بالإنتعاش والطاقة، ولو شربتوه في السحور مش هتفقدوا كتير من طاقتكم وقت الصيام، وكمان مشروب اللوز مفيد للقلب والشرايين، ومضاد للأكسدة، وبيحمي من الجلطات، وبيظبط ضغط الدم، وبينظف الصدر، وبيفتح مجرى التنفس، ومهم جدًا للمدخنين ومرضى الربو والحساسية.

وأخيرًا..

كل المشروبات اللي فاتت تقدروا تعلموها في البيت أو ممكن تشتروها من مكان موثوق، ولكن خلوا بالكم أن لازم يكون كل المشروبات طبيعية مش مصنعة أو فيها ألوان طبيعية ومواد حافظة، ومن الأفضل أن كل المشروبات تكون من غير سكر، ولو مش هتقدروا على طعمه ممكن تحلوا بعسل النحل، ورمضانكم كله صحة وعافية.