The Definitive Guide to Living in the Capital , Cairo , Egypt

خلال فترة بسيطة شوفنا الأسواق الكبيرة والسوبر ماركت الصغيرة وأي مكان بيبيع سلع استهلاكية أو مواد غذائية بقى مليان ناس وفاضي من البضائع، وده حصل علشان الناس قررت تخزن مواد غذائية بدون أي سبب أو داعي.. لكن ممكن نعتبر إن الخوف وقلة الوعي المحيط بأزمة “كورونا” اللي انتشر في العالم، سبب كافي خلى الناس تتوجه للأسواق بسلوك غير واعي أو عاملين حساب لأي احتياطات أو طرق أمان ممكن ياخدوها في وسط الاحتكاك والزحمة.. علشان كده حبينا نقولكم في كايرو 360 على نصائح خاصة باحتياطات الأمان أثناء التسوق في الأماكن الزحمة هنعرفها من الدكتورة “إيمان حمدي” المسؤولة في عيادة “سمايل جاردن – Smile Garden“:

أول حاجة مهم تاخدوا بالكم منها لما تنزلوا للتسوق، هي عدم اصطحاب الأطفال معاكم نهائيًا، لإن التسوق في اليوم ده، وفي الظروف دي مش رحلة في يوم ربيعي جميل، إنما مغامرة أنتم بتدخلوا فيها لأماكن فيها تجمعات كبيرة جدًا.. وسواء كانت الأماكن مفتوحة أو مقفولة هتفضل التجمعات حاجة مضرة للأطفال، خاصةً مع شقاوتهم وتحركاتهم الكتير، ولمسهم للأسطح.

كمان مهم نعرف إن أي شخص كبير في السن هو معرض بقوة للإصابة بفيروس كورونا، لإن طبيعي إن مناعته تكون ضعيفة، أو في عند بعضهم مشاكل في التنفس، فمن ضمن الممنوعات اصطحاب كبار السن، وبالذات كمان لو حد عنده تعب زي دور برد.. فبالتالي الجلوس في البيت ضروري لحد ما تخفوا، ولو خروجكم ضروري يبقى لازم تلبسوا كمامة.. والكمامة في العموم بتتلبس في حالتين، الأولى في حالة -لاقدر الله- إصابتكم بالمرض، والتانية في حالة إنكم عاوزين تحموا حد خايفين عليه من المرض.

كمان قبل ما تلبسوا الكمامة، لازم تغسلوا إيديكم بالماء والصابون كويس، وتبقوا متأكدين إنها صالحة للاستخدام كوقاية، مع العلم إن منظمة الصحة العالمية أكدت على إن الكمامة الوحيدة اللي بتساعد على الحماية من كورونا هي N95، وباقي الكمامات هي مجرد وقاية عادية، وأول ما تحسوا إنها ندت أو دبلت إرموها لإنها بكده مبقتش صالحة للاستخدام.

نرجع تاني لوجودكم في الأسواق، ونأكد على إن لازم تلبسوا قفازات “جونتيات” للاستخدام الواحد، ودي كمان هتلاقوها متاحة في أماكن تسوق كتيرة مجانًا للعملاء، ولو مفيش إمكانية إنكم تغسلوا إيديكم كل شوية، يبقى لازم يكون معاكم مطهر أو معقم لليد، ومهم يكون بيحتوي على كحول، وتقدروا تعقموا بيه إيديكم كل شوية.

لما تيجوا تاخدوا منتج أو حاجة من على الرف أو المكان المخصص ليها في السوبر ماركت، بلاش تلمسوها إلا لو هتشتروها فعلًا، ولما تاخدوها عقموا إيديكم بالمطهر، وكمان لما تكونوا بتحاسبوا عند الكاشير، خلوا بالكم إن الورق والفلوس من أسباب انتقال “كورونا” علشان كده لما تدوا أو تاخدوا فلوس لازم إيديكم تكون معقمة، قبل وبعد، واستغنوا عن الريسيت أو الفاتورة النهائية لو أمكن.