نصائح مهمة من أخصائية نفسية.. دليلك لتربية طفل سوي نفسيًا في القاهرة
الحياة في القاهرة تربية طفل تربية طفل سوي نفسيا تعديل سلوك الأطفال علاج مشاكل الأطفال النفسية مشاكل الحياة في القاهرة ميار سباق نصائح لتربية طفل
Cairo 360
يمنى أحمد
فيه مليون سبب يخلونا نعشق القاهرة، عراقتها وتاريخها وآثارها ومناطقها وكونها العاصمة اللي فيها كل المتطلبات، وغيرها كتير من الأسباب، لكن من ناحية تانية فيه سلبيات للحياة في القاهرة، علشان كده في كايرو 360 قررنا التحاور مع الدكتورة ميار سباق، أخصائية الصحة النفسية والتربية الإيجابية وتعديل سلوك الأطفال، علشان تدلنا على الطريقة المناسبة للتعامل مع ضغوطات الحياة في القاهرة واللي بتزيد يوم عن يوم، واختارنا “ميار” تحديدًا بسبب تميزها الكبير في مجالها، وده نص الحوار:
إيه التحديات اللي بتواجهها أمهات القاهرة عن أي مدينة تانية؟
أنا بشوف إن أهم 3 تحديات هم:
سباق الأحسن.
لأن القاهرة هي العاصمة اللي بيتوفر فيها كل سبل الحياه زي وجود الشركات الكبيرة والمدارس بكل أنواعها والنوادي ومدن الألعاب وكل سبل الترفية المتنوعة، فالأمهات في القاهرة بقوا عايشين في سباق الأحسن والأفضل.
تدخلات المجتمع والبيئة المحيطة.
لأن البيئة حوالين الطفل بقت كبيرة جدًا ومبقاش الأم والأب بس المتحكمين في سلوك الطفل، فهتلاقي إن الطفل متأثر بأصحاب المدرسة أو بمجتمع النادي واللي كل حد فيهم له خلفية مختلفة.
القلق والتوتر اللي بتسببه ضغوطات الحياة.
القلق والتوتر والعرضة للاكتئاب واللي بيقاومهم الإنسان كل يوم عشان يقدر يكمل حياته، دي من أصعب التحديات.
إزاي زحمة القاهرة بتأثر علي نفسية الأسرة؟
الزحام والاحتشاد الكبير في القاهرة خصوصًا في فترة الصيف، مع وجود التزامات العمل والمدارس والتمارين، ده بيخلي الأسرة التي تتعرض يوميًا للزحام و الأصوات الصاخبة تكون أكثر عرضة للإصابة بالتوتر والقلق النفسي.
إزاي البيئة الصاخبة بتأثر على نشأة الطفل في القاهرة؟
من ضمن أهم العوامل المؤثرة في نمو الأطفال هو البيئة اللي يتربى وسطها وأولها طبعا الأسرة والمكان اللي عايش فيه والمدرسة، فالطفل في الريف بتحيطه الخضرة والهدوء مهما تطورت الحياة في الريف فأنه له طابعه الخاص علي عكس القاهرة فإن الطفل ينشأ في صخب الحياة والزحام والتطور السريع يوميًا.
إيه هو الجانب الإيجابي في نشأة الطفل في القاهرة؟
في رأيي هم جانبين: أولهم الرعاية الطبية اللي بتتوفر في القاهرة أكثر من الريف، والثاني هو جودة التعليم وده بيكون في تنوع المدارس بأشكالها واختلاف مناهجها.
ضغط الحياة مؤلم …نصيحة تخلي نفسية الاسرة أحسن.
أولًا، يكون فيه مستقطع من اليوم يعمل كل فرد من أفرادها حاجة بيحبها سواء قبل الشغل وزحمة اليوم أو بعده أو قبل النوم، حتى لو قراءة صفحة من كتاب، تاني حاجة نحاول نفصل دماغنا عن مشاكل الشغل بره الشغل والعكس، تالت حاجة نحاول نفرغ طاقتنا صح ونتحكم في انفعالاتنا اليومية.
فيه اختلاف ما بين العاصمة وأي مدينة تانية في حرية تنقل الأطفال ولعبهم براحتهم.. إزاي الأمهات تقدر تتعامل مع مواقف اكتئاب الأطفال بسبب حبستهم في البيت وعدم خروجهم؟
الأمهات تقدر تحاول تخلي الأطفال يشوفوا مساحات خضراء على الأقل مرة في الأسبوع عن طريق التنزة في الحدائق، لأن ده بيأثر جدًا على نفسية الطفل والإنسان البالغ كمان، لكن مانكتفيش بالمولات و مدن الملاهي لأن الطفل محتاج مساحة يجري ويلعب بحرية.
ممكن دليل لأهل القاهرة يهتموا من خلاله بحياتهم الاجتماعية ويعوضوا غياب الونس؟
أعتقد لو قدرنا نحافظ علي الزيارات العائلية، وزيارات الأصحاب ومتقتصرش علي الأعياد، ده هيساعد إن نفسيتنا تبقي أحسن، لان أنا كل أما بحاوط نفسي بناس بتحبني وبتدعمني ده بيجدد طاقتي، وبيديني قوة جديدة لمواجهة ضغوطات الحياة.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
