Mohamed Talaat
بعد انتشار فيروس “كورونا” في عالمنا، ناس كتير بدأت تشتري كميات أدوية كتير سواء للمناعة أو لاعتقادها إنها علاج بيساعد على شفاء المصابين بالفيروس.. لكن الأمر ده حذرت منه هيئة الدواء المصرية، واللي أكدت أن مافيش أي أدوية ثبت إنها ممكن تبقى وقاية من الإصابة بفيروس “كورونا”، وفي السطور الجاية هنقول لكم على الآثار الجانبية لاستخدام الفيتامينات والمكملات الغذائية وأدوية تقوية المناعة من غير لازمة.
هيئة الدواء ناشدت المصريين أنهم مايشتروش أدوية المناعة والمكملات الغذائية والفيتامينات ويخزنوها، وخاصة اللي بتكون ضمن بروتوكول علاج فيروس “كورونا”، لأن ده هيتسبب في نقص الأدوية من السوق، وهيعرض حياة المصابين الحقيقيين للخطر لأنهم بيعتمدوا على الأدوية دي بشكل أساسي في علاجهم.
وكمان حذرت الهيئة من نشر أي توصيات أو وصفات طبية للوقاية أو العلاج لفيروس “كورونا” على مواقع التواصل الاجتماعي، علشان الوصفات دي ممكن تكون سبب في مضاعفات وأثار جانبية خطيرة لكل اللي هيستخدموها، وكشفت أن الاستخدام المفرط للفيتامينات هيعمل مضاعفات وهيكون خطر على صحتكم.
ووضحت هيئة الأدوية أن استخدام فيتامين D بدون ضرورة طبية بيعمل ضعف عام ومشاكل في الكلى، وكمان هيكون فيه شعور بالقئ وهيعمل مشاكل واضطراب في ضربات القلب في حالة انه اتاخد مع دواء ديجوكسين، وأن الاستخدام الزيادة للزنك بيعمل أعراض شبه الإنفلونزا وتغيير في حاسة التذوق، وبيعمل شعور بالقئ وكمان بيخفض مستوى السكر في الدم.
أما استخدام فيتامين ج بدون ضرورة طبية بيعمل صداع دائم وأرق وإسهال، وشعور بالغثيان ومغص، والأخطر انه بيأثر على صحة الأطفال الرضع وكمان خطر على السيدات خلال فترة الحمل، وممكن يسبب الوفاة بالقلب لمرضى السكر.
وناشدت هيئة الدواء المصرية المواطنين بمتابعة صفحتهم على الفيسبوك واللي تقدروا تزوروها من هنا، علشان تقدروا تعرفوا من خلالها كل المعلومات المهمة الخاصة باستخدام أدوية المناعة والفيتامينات والمكمات الغذائية، وهتعرفوا كمان إيه هي المصادر الطبيعية للفيتامينات.
نتمنى لكم السلامة يا أهل القاهرة!
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
