The Definitive Guide to Living in the Capital , Cairo , Egypt

كل ما بتهل نسمات الربيع، بتهل معاها روايح شم النسيم اللي مش بتخلى من الأكلات المصرية التقليدية الخاصة باليوم ده، واللي بتبقى عبارة عن “الفسيخ” للمحترفين و”الرنجه” للهواة والمبتدئين واللي مش بيحبوا الفسيخ.

ومع كل شم نسيم، بتتملي الحدائق والمنتزهات والأماكن المفتوحة بالناس، والأطفال، لكن على الناحية التانية كمان المستشفيات والطوارئ بتتملي بحالات تسمم غذائي بسبب المبالغة في أكل الفسيخ أو الرنجة بشكل مش صحيح ومش صحي.

علشان كده، وبحسب نصايح قالها الدكتور مصطفى ساري – استشاري التغذية وعلاج السمنة- لموقع “مصراوي” فيه 6 حاجات لازم ناخد بالنا منها لما نيجي ناكل فسيخ أو رنجة:

• أكل الليمون ضروري جدًا مع الفسيخ أو الرنجة باعتباره مضاد للأكسدة.

• علشان تقلل من الأملاح اللي في الفسيخ، حاول تاكل خضروات كتير منها “الخس” وده لإن فيه نسبة كبيرة من الألياف والبوتاسيوم.

• من أهم المواد “المُطهرة” للأمعاء، الفلفل الحامي والبصل، وكمان مهمين لتنشيط عملية الهضم.

• الجرجير والبقدونس بيسرعو من عملية الهضم، وبيظبطو نسبة الصوديوم في الفسيخ.

• لازم تاكل أي فاكهة بعد الفسيخ وليكن مثلًا موزتين.

• اشرب شاي أخضر لإنه بيشتغل كطارد للسموم والأملاح، أو اشرب كركديه لو عندك مشكلة في الضغط لإن الأملاح الموجودة في الفسيخ بتسبب ارتفاع في الضغط.

طبعاً النصايح دي بتعمل بيها وانت بتاكل، أما قبل الأكل، مهم جدًا تعرف إيه العلامات اللي تقولك إذا كان الفسيخ كويس ولا فاسد:

• بطن السمكة ماتكونش منتفخة ولا ريحتها وحشة بشكل مبالغ فيه.

• اضغط على السمكة كويس، لو الضغطه رجعت مكانها تاني تبقى كويسة.

• قشر السمك بشكل عام، سواء فسيخ أو رنجه بيكون فيه لامعة متماسكة، مش سهل تروح إلا لو نضفتها بنفسك.

• عنين السمك في كل الأحوال بارزة وبتلمع.

• ركز مع خياشيم السمكة كويس، ولازم يكون لونها أحمر أو وردي.

في النهاية، أسرة كايرو 360 بتتمنالكم شم نسيم سعيد وأجازة سعيدة، وكل سنة وانتم طيبين.