Cairo 360
مين فينا مش عايز دايمًا يكون بصحة كويسة؟ أكيد كلنا نحب نفضل على طول في أحسن حال، علشان كده جبنا لكم أهم 8 نصائح للحفاظ على صحتكم. حسب ما نشر موقع “Net Doctor”:
1- خليك نشيط واتحرك
أهم حاجة علشان تحافظ على صحتك، إنك لازم تكون نشيط وبتتحرك كتير. مع تقدم السن معدل الأيض في الجسم بيقل، وده معناه قلة حرق الدهون. فالحركة شيء أساسي علشان تزود الحرق.
2- حول الأعمال الروتينية لتمارين رياضية
لو ماعندكش وقت للجيم، خلي روتين يومك هو التمرين. مثلا لو بتروح مشوار بشكل يومي، ممكن تروحه مشي بدل ما تركب. أو ممكن تساعد في تنظيف البيت بشكل دائم.
3- اهتم بصحتك الجنسية
دي من الحاجات اللي دايمًا بنتجاهلها، وبنشعر بالحرج منها. لكن ضروري جدًا الاهتمام بالصحة الجنسية، واستشارة الطبيب المتخصص عند الضرورة.
4- ابعد عن الأصوات العالية
لازم توطي صوت التليفزيون أو الأغاني في السماعات، وتخليها بالقدر المناسب للسمع. وكمان لازم تجفف ودنك من المية، لكن بشكل لطيف. وماتستخدمش أعواد القطن بإفراط.
5- كل أكل صحي
يُفضل تتبع نظام غذائي صحي يشمل الخضراوات والفاكهة. واللي بتكون غنية بمضادات الأكسدة والفيتامينات الحيوية. بالإضافة لتقليل السكر والملح، واستبدال المياه الغازية بالعصائر والشاي الخضر.
6- تناول الفيتامينات
فيتامين “د” مفيد جدًا لتحسين صحتك العامة. وبيقلل خطر الإصابة بالربو وأمراض القلب. علشان كده لازم تاخد قرص فيتامين “د” بعد استشارة الطبيب، وخاصة في الشتاء
7- اهتم بصحتك النفسية
لازم تبعد عن أي حاجة بتسبب لك التوتر أو القلق. لأن ده هيأثر عليك نفسيًا بشكل سلبي، وبالتالي هيضر صحتك.
8- النوم الجيد
من أهم عناصر الاهتمام بالصحة، النوم الجيد. وده معناه حصول جسمك على قدر كافي من النوم يوميًا. واللي هو من 6 لـ 8 ساعات. لأن قلة النوم هتسبب إجهاد مزمن لجسمك على المدى الطويل.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
