The Definitive Guide to Living in the Capital , Cairo , Egypt

لو كنت بتعاني من التهاب حلق أو حكة جلد أو حموضة أو حتى إمساك، أكيد بتتضايق ومودك بيتشقلب، وأول حاجة بتفكر فيها أنك تروح الصيدلية وتأخذ دواء. الكلام ده مش دايمًا أحسن حل.

المشاكل دي ممكن تواجهنا في أي وقت، والدواء اللي ممكن يعالجنا مرة مش دايمًا بيجيب نتيجة، لا وكمان ممكن يعمل لك مشكلة، وعلشان كده بننصحكم تروحوا الأول على المطبخ قبل ما تفكروا في الأدوية.

ليه المطبخ؟ في أكلات معينة لها خواص غذائية مفيدة جدًا وبتعالج أمراض كثيرة، وكمان سعرها رخيص، وهنا جمعنا لكم تسعة أفكار علاج في البيت سهلة وسريعة. كفاية مقدمات وخلونا ندخل في المفيد.

الكركم … مطهِّر

الكركم يعتبر من أهم الأغذية الغنية بمضادات الالتهاب والأكسدة، وفي ثقافات بتعتبر الكركم "بودرة سحرية" لقدرته على وقف نمو البكتريا الضارة ومقاومة الالتهابات وعلاج الجروح السطحية.

التفاح … مضاد للحموضة

لو كنت من عشاق الأكل السبايسي أو بتحب تدلع نفسك بأكلة من الوزن الثقيل قبل ما تنام، في احتمال كبير أنك هتعاني من الحموضة. هنا تظهر أهمية التفاح وقدرته الرهيبة على مقاومة الحموضة وارتجاع المريء، أصل التفاح يا جماعة غني بمادة البكتين اللي بتمتص حموضة المعدة وتضبط عملية الهضم.

السكر … ومقاومة الزغطة

الزغطة بتحصل لنا لما نأكل بسرعة زايدة وجسمنا ما يقدرش يلاحق، وعلشان تتخلص منها هتحتاج شوية سكر تحت لسانك علشان ريقك يجري، وبكده تقدر تنسى الزغطة للأبد.

القراصيا … مٌليِّن طبيعي

الإمساك مشكلة بتواجه معظمنا، والسبب هو عادات أكلنا الغلط، بس عصير القراصيا ممكن يساعدك بصفته مٌليِّن وغني بالألياف غير القابلة للذوبان فبيقدر يساعد جهازك الهضمي يتخلص من بواقي الأكل ويهضمها كويس.

الشوفان … علاج للإكزيما

الشوفان أسطورة مافيش كلام، وكفاية نقول لكم أنه علاج للإكزيما والحصبة وقرصة الحشرات وحساسية الجلد، وكمان يعتبر من أحسن العلاجات الطبيعية لمشاكل الجلد. كل المطلوب تطحن شوية شوفان وتنقعهم في مياه فاترة، وبعدها تضعه على الجلد.

عصير الثوم .. احتقان الحلق

عصير ثوم؟ طب إزاي!

أيوه، عصير الثوم من أحسن العلاجات لاحتقان الحلق لأنه غني بمضادات الجراثيم والميكروبات. اخلط خمسة أو ستة فصوص ثوم في كأس مياه فاترة واشربه كام يوم وحلقك هيبقى تمام.

الكريز … مضاد للأرق

ننصح كل اللي بيعانوا من الأرق يأكلوا كريز قبل النوم بساعة، والسبب إن الكريز يعتبر مصدر طبيعي للميلاتونين، وهو هرمون بتفرزه أجسامنا لتنظيم عملية النوم والتحكم في الساعة البيولوجية لجسمنا. شوية كريز حلوين وهتأكل رز مع الملائكة.

الفراولة … معجون أسنان

معجون الأسنان في الحقيقة مش بيحمي أو يبيض الأسنان. لكن الفراولة تعتبر بديل طبيعي أحسن. جرّب تضرب الفراولة وتعملها معجون وتفرك بها أسنانك بهدوء، وبعدين تسيبهم دقيقتين وتغسل أسنانك.

الزنجبيل … علاج للدوخة

الزنجبيل سواء كنت هتشربه أو تأكله فهو علاج ممتاز للدوخة وبيمنع القيء، والفضل يرجع للمادة الكيميائية الموجودة في جذور الزنجبيل، وكمان يعتبر من أحسن العلاجات المنزلية لعلاج وجع المعدة.