The Definitive Guide to Living in the Capital , Cairo , Egypt

محمد البدري

الصورة الرئيسية: Felipe Bustillo

طول عمرنا بنفضل موسم عيد الأضحى عن موسم عيد الفطر، علشان نوعية الأفلام اللي بتتعرض فيه بتكون أقوى ومؤثرة أكتر. لكن في موسم 2025، واضح إن الأفلام اللي داخلة سباق عيد الأضحى قليلة ومفيهاش جديد يذكر. تعالوا نعرف إيه الأفلام دي وبتحكي عن إيه.

المشروع X: كريم عبد العزيز في حتة تانية

الفيلم الأول في سباق عيد الأضحى 2025 هو فيلم المشروع إكس، بطولة كريم عبد العزيز وياسمين صبري وإياد نصار وأحمد غزي وعصام السقا.

الفيلم بيحكي عن ظابط شرطة بيحاول يتصدى لعصابة تهريب آثار، وفي نفس الوقت بيتعرف على غواصة عايشة في الجونة. ومن خلال الاتحاد بينهم، بنشوف مغامرات كتير ما بتنتهيش.

الفيلم متميز جدًا في الإنتاج الضخم ومشاهد الأكشن، والمخرج بيتر ميمي عامل شغل ممتاز. وواضح إن الفيلم هيكون لاعب أساسي في موسم عيد الأضحى 2025.

ريستارت: تامر حسني وجنون الترندات

الفيلم التاني معانا هو فيلم ريستارت، من بطولة تامر حسني وهنا الزاهد وباسم سمرة ومحمد ثروت وعصام السقا.

الفيلم بيحكي عن جنون الترند وسعي اتنين (محمد وعفاف اللي قام بدورهم تامر حسني وهنا الزاهد) لكسب فلوس من السوشيال ميديا بأي طريقة. وده اللي بيخلق الكوميديا من خلال الأحداث. في نفس الوقت، الفيلم بيركز على خطورة انتشار الترندات ومحاولة الناس إنها تكون “ترند” بأي شكل، حتى لو كان على حساب حياتهم الشخصية.

سيكو سيكو: نجاح مستمر

أما مفاجأة عيد الأضحى 2025 فهي استمرار عرض فيلم سيكو سيكو من موسم عيد الفطر لحد دلوقتي. وده نجاح ما نقدرش نتجاهله. وممكن تقروا الريفيو التفصيلي بتاعنا عن الفيلم من هنا.

سيكو سيكو من بطولة عصام عمر وطه الدسوقي، واللي بيلعبوا دور يحيى وسليم، أولاد العم اللي بيتوفى عمهم، وبيسيب لهم تركة عبارة عن سلع مش مشروعة. وبنشوف في الفيلم محاولتهم المستميتة لبيع “البضاعة” والحصول على الفلوس.

الفيلم زي ما قلنا حقق نجاح كبير، ومش بعيد يقدر ينافس في موسم عيد الأضحى 2025، خصوصًا إن الموسم السنة دي مش بيعرض فيه أفلام جديدة لأول مرة من سنين طويلة.