The Definitive Guide to Living in the Capital , Cairo , Egypt

كل شيء بدأ في “الفندق”، الفيلم الإذاعي اللي وقعني في حب قناة “أوريجو” على يوتيوب. “أوريحو”؟ دي يا سيدي قناة بتنتج محتوى صوتي.. ما فيه ناس كتير بتعمل محتوى صوتي؟ لأ دي حاجة تانية، دول ناس بيبدعوا أفكار مدهشة، هتخليك تدرك حجم نعمة الصوت والخيال. صوت؟ أيوة هم بيعملوا محتوى صوتي مبهر.. خيال؟ أيوة بيقدموا قصص صوتية مبنية على إبداع كتبه ميسرة الدندراوي، المؤلف والمخرج والممثل اللي فاهم يعني إيه الصوت ممكن يكون عالم خيالي كبير، ماحدش يعرف يجيب آخره.

“الدندراوي” مش هو كلمة السر الوحيدة في إبداع القناة دي، فيه أصوات ساحرة ثانية من حسن حظنا إنها موجودة في عالم البوكاست الصوتي، ممثل صوتي اسمه جمال حداد، قادر يخليك تضحك وتخاف وتفكر وتسافر من مكانك لعوالم عجيبة، وشخصية غريبة اسمها ماهر الرفاعي، رئيس تحرير فاسد لكنه يتحب ويتصدق، وقادر يعرفك إيه اللي بيحصل في عالم الصحافة الصفراء، وأكيد هتحب طريقته وهو بيقول على عناوينه الصحفية السطحية “يا سلااام”!

والنماذج المبدعة كثيرة في “أوريجو”، ممثلين وممثلات “صوتهم” بيخليك “تشوف” كل حاجة، وأعمالهم كثيرة، مسلسل حارس، مسلسل المغامرون الخمسة، الفيلم الإذاعي “آثار جانبية”، وعشرات الأعمال الأخرى. 

“أوريجو” تجربة صوتية غريبة، تقع في حبها، وتدمن أصوات مبدعيها، وتحترم إصرارها على النجاح. لكن ليه نتكلم كتير بتكتكة صوت الكيبورد، لو كنا نقدر نسمع الصوت بنفسنا. اسمعوا مجموعة فيديوهات من إبداع فريق أوريجو، ومين عارف، يمكن  بعدها نصدر “صوت” إعجاب يستحقه صناع القناة.

للاستماع لأعمال أوريجو اضغطوا هنا.