The Definitive Guide to Living in the Capital , Cairo , Egypt

الصورة: صفحة وزارة الشباب والرياضة على فيسبوك

لو بتحب التمثيل والفن.. ولو شغوف بالرسم أو النحت أو الجرافيك، دلوقتي جتلك الفرصة تشارك في أحدث المسابقات الفنية في مصر، واللي بتحتفي بأسطورة ما زال حاضر في وجدان الملايين: الزعيم عادل إمام.

“مسابقة الزعيم”.. تحية فنية لرمز مصري

أطلقت منصة Egy Talents بالتعاون مع وزارة الشباب والرياضة، مسابقة فنية ضخمة تحت اسم “الزعيم”، وبتدعو فيها الفنانين التشكيليين من سن 18 لـ 45 سنة إنهم يقدموا أعمالهم الفنية المستوحاة من مسيرة الفنان عادل إمام، اللي أعاد تعريف النجاح على طريقته الخاصة، وأثبت إن الإخلاص والجدية ممكن يصنعوا زعيم حتى في عالم التمثيل.

إزاي تشارك؟

المطلوب إنك تنفذ عمل فني بيعبر عن رؤيتك للزعيم، سواء برسمة بورتريه، أو مشهد مؤثر من أفلامه أو مسلسلاته أو مسرحياته، أو حتى منحوتة أو تصميم فني رقمي.

الخامات* براحتك! تقدر تستخدم أي خامة أو تقنية فنية تحبها، سواء رسم تقليدي أو رقمي، نحت، أشغال فنية، تصوير، أو حتى جرافيك.
الأبعاد؟ الأعمال المسطحة لازم تكون بمقاسات ما بين 50×50 سم كحد أدنى، و150×200 سم كحد أقصى. ولو العمل مجسم، تكون أبعاده ما بين 40 سم و150 سم مربع.

شروط التقديم؟

العمل لازم يكون أصلي ومن إنتاج الفنان نفسه، وماينفعش يكون شارك في مسابقات تانية أو اتعرض قبل كده على السوشيال ميديا، وكمان لازم تبعت 3 صور توضح مراحل تنفيذ العمل، من ضمنهم الصورة النهائية، بجودة عالية ومقاسات واضحة.

لجنة التحكيم

الأعمال هتتقيم من خلال لجنة تحكيم متخصصة مكونة من: د. أحمد موسى، ود. مراد درويش، ود. أحمد صابر.

الجوائز

المركز الأول: 30,000 جنيه
المركز الثاني: 25,000 جنيه
المركز الثالث: 20,000 جنيه
وفيه كمان جائزة خاصة من لجنة التحكيم.

خطوات المسابقة ومواعيد التقديم

التقديم مفتوح لحد يوم 10 أغسطس 2025 من خلال الموقع الرسمي: (اضغط هنا).

بعد كده هيتم فرز وتقييم الأعمال من قِبل لجنة التحكيم، واللي هيمثل تقييمهم 70% من النتيجة النهائية.

أما الـ 30% الباقيين، فهتكون من خلال تصويت الجمهور.

وأخيرًا، هيتعمل معرض فني كبير لأفضل الأعمال المقدمة، ضمن احتفالية خاصة بتكريم مسيرة الزعيم.