The Definitive Guide to Living in the Capital , Cairo , Egypt

بعد افتتاح العرض المسرحي “3 أيام ف الساحل” للفنان محمد هنيدي، أعلن الكيان الترفيهي الجديد والقادم بقوة في مصر “كايرو شو” عن خطته الإنتاجية لسنة 2019.

“كايرو شو” كيان ترفيهي بدأ بشكل جديد في مصر، وتخصص في انتاج العروض الفنية والمسرحية اللي بتعتمد على تكنولوجيات حديثة وامكانيات عالية.

الخطة الإنتاجية لـسنة 2019 لـ “كايرو شو” هتضم خمس مسرحيات جاهزين للعرض فعلاً خلال السنة دي، ومسرحيتين هيبدأ الاستعداد ليهم قبل نهاية السنة، وده اللي قاله المخرج والمنتج “مجدي الهواري” واحد من الفريق اللي خلى الكيان ده يشوف النور.

“الهواري” قال إنه خلال النص الأول من السنة دي، في ثلاث مسرحيات هيتعرضوا، الأولى رائعة شكسبير الكلاسيكية (الملك لير) لأيقونة الفن العربي النجم الكبير “يحيى الفخراني” ، والتانية المسرحية الغنائية الشبابية (اللي عليهم العين) اللي هيقدمها فريق “بهجة” والتالته مسرحية الأطفال “not frozen”.

وعلى حسب ما قال “الهواري” لوسائل إعلام مصرية ففي النص الثاني من السنة دي، هيقدم النجم “أكرم حسني” أولى تجاربه المسرحية وهي كوميديا (المدينة الفاضحة)، ده غير عرض (الشاطر حسن) اللي هيتقدم بأسلوب وتقنيات بتتقدم لأول مر في المسرح المصري.

الفريق المبدع اللي اتكلمنا عنه، وكان ورا النجاح اللي حققه “كايرو شو” لحد النهارده، مكون من مجموعة من أنجح صناع الفن والمحتوى الترفيهي في مصر، ويمكن في العالم العربي كمان، وهم “مجدي الهواري”، و”محمد هاني” و”وليد صبري” و”منار الأمين” و”حامد عرفة”.

المؤسسين قالوا في أول بيان ليهم، واللي اتوزع على عدد كبير من وسائل الإعلام والمواقع الإلكترونية، إن الهدف من إنشاء كيان ترفيهي زي “كايرو شو” هو إعادة إحياء صناعة المسرح المصري الجماهيري، وتقديم العروض الحية الغنائية والموسيقية بمواصفات تليق بعراقة الفن المصري وفي نفس الوقت تناسب العصر وترفع شعار (الفن.. من القاهرة إلي كل الجمهور العربي).

“كايرو شو” هتقدم عروضها علي أربع مسارح مصممة بمواصفات وشخصية مميزة، هي مسرح “كايرو شو” في 6 أكتوبر، ومسرح “كايرو شو” في التجمع الخامس، ومسرح “كايرو شو” في الهرم، وقريب هيعلن عن مسرح “كايرو شو” الذهبي، رابع مسارح الكيان.