The Definitive Guide to Living in the Capital , Cairo , Egypt

بدأت السينما المكسيكية تكتب اسمها بحروف من ذهب في محافل السينما العالمية، وتسيب بصمة مهمة على كل سجادة حمراء في أي مهرجان دولي، وده بشهادة من عمالقة صناعة السينما في العالم، ومش بس بأفلامها الروائية الطويلة، لأ ده إحنا ممكن بكل بساطة نلاحظ منافستها لشركات تقيلة في عالم صناعة الأفلام الأنيميشن أو الكارتون، وبقينا نشوف أفلام كتير في سينمات الوطن العربي من انتاج المكسيك.

النهارده اختار مهرجان القاهرة السينمائي الدولي السينما المكسيكية كـ “ضيف شرف” على دورته الـ 41 اللي هتبدأ فعلياتها 20 نوفمبر وهتستمر لمدة 9 أيام، وهيعرض المهرجان بالمناسبة دي 8 أفلام مكسيكية، وهيكرم اثنين من صناعها هما كاتب السيناريو والمخرج “جويرمو أرياجا” والمخرج “كارلوس ريجاديس”.

المخرج المكسيكي “جابرييل ريبشتاين” واللي فاز بجائزة أفضل عمل أول من مهرجان برلين السينمائي في 2015 وابن المخرج المكسيكي المشهور “أرتورو ريبشتاين” هيكون هو كمان ضيف مهرجان القاهرة.

هيشارك في الدورة الـ41 لمهرجان القاهرة السينمائي الدولي حوالي 150 فيلم من 63 دولة، وهتكون الدورة باسم الناقد الراحل والمدير الفني للمهرجان “يوسف شريف رزق الله”.