The Definitive Guide to Living in the Capital , Cairo , Egypt

بيقولوا دايمًا إن المغامرة ليها ناسها.. وكتير بنشوف مغامرين بيعملوا حاجات مجنونة أوقات، ولطيفة أوقات تانية، ومؤخرًا لفت نظرنا مجموعة صور ليها هيبة كدة للقاهرة من فوق في وقت الحظر، صور مش زي أي صور ممكن تشوفوها للقاهرة، وغالباً صعب تتكرر ظروف تصويرها تاني، وده خلاها صور مختلفة ومميزة.

طيب ليه جبنا سيرة المغامرة في الأول، لما الكلام عن صور للقاهرة؟ هنقولك يا سيدي.. الأصول بتقول إن ما ينفعش ننشر الصور من غير إذن من صاحبها اللي صورها، وعلشان كده بدأنا رحلة بحث عن صاحب الصور، والمتوقع إن إسم الأكونت كمان كان غريب زي الصور اللي صورها، (Get Lost By Saad) هو ده الإسم اللي اختاره المغامر والمصور “أحمد سعد” لحساباته على السوشال ميديا (فيسبوك وإنستجرام).. ولما دخلنا الأكونت، لقينا مجموعة صور بتوثق مغامرات مش عادية لشخص موهوب سواء في مغامراته أو في كادراته ولقطاته اللي اخترها لتوثيق اللحظات دي، علشان كده تصويره للقاهرة كان مختلف زي مغامراته.

كملت دهشتنا لما قررنا نكلم أحمد، فلقيناه في رحلة للصحراء، بيقوم بمغامرة جديدة، فسريعًا كده سألناه عن صوره المختلفة للقاهرة من فوق، والفكرة جت منين، وقال لنا إنه قرر يسمي سلسلة الصور دي بإسم (التاسعة مساءً) وده الوقت اللي بتكون شوارع القاهرة فيه فاضية تمامًا من أي ناس أو عربيات، بعد قرار حظر التجوال اللي فرضته الحكومة كإجراء وقائي للحد من انتشار فيروس “كورونا” المستجد.

في الصور بتظهر مجموعة من أكتر شوارع القاهرة ازدحامًا بالناس في الأوقات العادية، لكنها بسبب الحظر فاضية تمامًا، وبتلمع بأضواءها الساحرة، ودي كانت واحدة من الحاجات اللي خطرت في بال “سعد” وخلته يوثق اللحظات دي بلقطات جوية لشوارع القاهرة.

لو عاوزين تشوفوا مجموعة صور “التاسعة مساءً” كاملة، شوفوها على الفيسبوك من هنا، أو على الإنستجرام من هنا.

وممكن كمان تتابعوا أحمد على الإنستجرام من هنا.