The Definitive Guide to Living in the Capital , Cairo , Egypt

يمنى أحمد

تفاصيل القاهرة عميقة جدًا، إحنا عايشين في مدينة أغلب مبانيها وشوارعها وميادينها بتحكي حكايات مثيرة عن التاريخ والزمن والبشر، مش كتير للأسف مؤمنين بالأمر ده، لكن أسامة، الشاب اللي من أصل مصري لكنه منشأش فيها، قرر يعمل حاجة مختلفة تمامًا تخليه يستمتع بتفاصيل الحياة في مصر، وفي نفس الوقت يتعلم منها ويعلم بيها، وكانت القاهرة هيا حضنه اللي قدر ينفذ فيه حلمه الصغير اللي بقى كبير أوي ده. خلينا نشوف أسامة عمل إيه!

في كايرو 360 بنبحث دائمًا عن قصص ملهمة حية في حدود بوابات العاصمة، ومؤخرًا، اكتشفنا جروب للتصوير الفوتوغرافي اسمه “حمقري“، الاسم كان غريب بس لقطاته حلوة وعليه أكتر من 51 ألف عضو. دخلنا الجروب علشان نعرف مهمته إيه، وعرفنا إن أصل الحكاية هو إن شاب عنده 29 سنة قرر يعلم الشباب التصوير الفوتوغرافي مجانًا، ودي مش جدعنة منه، ده شايفها حق الناس دول عليه.

لحد هنا والموضوع يبان بسيط، لكن فكرة إنه ياخد الشباب دول في أوتينج تصوير مرتين أو تلاتة في الشهر وينزلوا المعالم السياحية يصوروها ويتعلموا فيها علشان يروجوا للسياحة في مصر، فدي كانت اللقطة. عظمة الصور مش بس في إن اللي لقطوها بيتعلموا، عظمة الصور كانت في روحها الحلوة، وإن الشباب دول عايزين يعملوا حاجة حلوة للبلد علشان تشجع السياحة لما ينشروها بعدها في جروبات السفر على مواقع التواصل.

في حواره مع كايرو 360 بيقول أسامة إنه اختار التصوير علشان هو هواية مميزة، غير إنه دي أكتر حاجة ممكن يفضل يعملها وميملش أبدًا، كمان الجولات دي هي امتداد لرسالة الجروب في التعليم لكن على أرض الواقع، الرسالة اللي بدأت أيام كورونا ولسه مستمرة لغاية النهارده.

رحلة حلوة كلها علم ومتعة وضحك، بيشوفوا فيها جمال الشارع المصري ويبروزه في صورهم وكتاباتهم، وكانت القاهرة القديمة هيا اللي ليها النصيب الأكبر في الجولات دي. المدهش إن أسامة مكانش له نصيب إنه نشأته تكون في مصر، هو عاش في إيران والسودان وسوريا وباكستان واستقر بيه الحال في مصر.

بس اشمعنا الاسم ده.. بيضيف شريف إن المعنى الحرفي لـ”حمقري” هو نص حمار ونص عبقري، و في بداية علاقته بالسوشيال ميديا اختار لنفسه الاسم المستعار ده لأنه كان شايفه مميز وبيعبر عن تضارب في آرائه، وبعدين أصبح معروف بالاسم ده وسط أصحابه ومعارفه وبقى زي لقب.

أسامة قرر إنه يعمل كل ده وفي ظل غلاء الأسعار الموجود حاليًا على نفقته الخاصة، في جوالاته اللي بدأت من مساجد القاهرة الإسلامية والمستمرة للقصور الموجودة سواء في الزمالك أو مصر الجديدة أو وسط البلد، المهم إنه معاه شباب بيشوفوا البلد دي بعيون مختلفة وزوايا حلوة بتخلينا نتأكد إن لسه فيها حاجة حلوة!

 

اعرفوا أكتر عن مشروع حمقري الفني من هنا.