The Definitive Guide to Living in the Capital , Cairo , Egypt

واقع التجربة في الحياة الاجتماعية علّمنا إن الركن الأساسي في استمرار وجودك وسط "شِلة" أو مجموعة صُحاب هي وجود اهتمامات مشتركة بينكم. دايمًا أمثال هذه الصداقات والعلاقات بتستمر لوقت أطول.

 

"اللقطة الواحدة" همّ مجموعة من الشباب-قلبًا وقالبًا- ملمومين حول شغف واهتمام واحد وهو "الرسم". المجموعة دي تأسست سنة 2002 يعني من حوالي أربعة عشر سنة ودة أول إنجاز المفروض يتحط في سِجِل إنجازتهم حيث إن أطول مدة عاشتها مجموعة فنية سنتين تلاتة على أقصى تقدير. الفنان د.عبدالعزيز جندي لما أسسها هو و 14 شخص غيره كانوا قاصرين المشاركة على أبناء الكليات الفنية بس، لكن بعد كده الموضوع أُتيح لكل شخص الفن بيجري في دمه أيًا كان تخصصه.

 

تعالوا نحكي لكم همّ بيعملوا إيه بالضبط:

شباب اللقطة الواحدة بيتجمعوا الجمعة من كل أسبوع قبل الصلاة في مكان من الأماكن اللي لسه الريحة المصرية فيها؛ ميدان سيدنا الحسين، القلعة، النيل.. الخ. وبيبتدوا يرسموا كلهم نفس المشهد بس كل واحد بيختار كادر وزاوية معينة خاصة به وهو ده سر اسمهم "اللقطة الواحدة". قعداتهم مش بتنحصر بس في الرسم هم كمان لهم كلامهم ونقاشاتهم الثقافية والفنية بشكل العام وده الشيء اللي بيُكسِب الخروج مع الفريق ده روح مميزة عن أي فريق أو نشاط تاني بيهتم بالرسم والفن.

 

فنانين اللقطة الواحدة عندهم معرضين كل سنة في مناطق مختلفة زي الأوبرا والزمالك، بعض المعارض بتاعتهم بتكون خيرية العائد بتاعها بيبقى طالع لأي من الجمعيات الخيرية، وفي اللي بيكون اللوح فيه للعرض بس وفي اللي بيكون الفنانين المشاركين عارضين لوحُهم للبيع.

وبالمناسبة المعرض الجاي لهم هيكون يوم 22 سبتمبر في متحف محمود مختار – قاعة النهضة وقاعة إيزيس، هيشارك فيها 51 بـ 102 لوحة.

يمكن اللي مقوّم الفكرة دي لغاية النهارده هو العمل في جماعة إيد واحدة ولهم كبير، شغلهم متقسم بينهم همّ مش حد من برا، فيهم مجموعة مسئولة عن الدعاية ومجموعة مسئولة عن الجرافيكس ومجموعة مسئولة عن الاتفاق مع أماكن المعارض.. وهكذا في كل أركان المشروع.

 

اللقطة الواحدة الروح والجو المناسب لأي فنان علشان يمارس موهبته وإبداعه، سواء كان طالب في الكليات الفنية فالموضوع هيكون مناسب جدًا له بسبب أنه ممنهج وفيه متابعة دكاترة ومعيدين لشغل المشاركين، أو كان مجرد هاوي مبتدئ فجلوسُه مع أهل الفن أكيد هينقل له حالهم، أو كان أصلًا بيرسم وتقيل بس مش لاقي البيئة والجو اللي هتزقُّه لفوق فالبيئة دي هي اللقطة.

ودي الصفحة بتاعتهم على الفيسبوك تقدروا تتباعوهم من خلالها يا فنانين.

دمتم مبدعين.