The Definitive Guide to Living in the Capital , Cairo , Egypt

النوبة من أجمل الثقافات المصرية، مليانة بأسرار كتير جدًا، وعلشان كده فيه مجموعة مكونة من 8 طالبات من كلية الإعلام بجامعة مصر الدولية قرروا يكون مشروع تخرجهم بيتناول النوبة وجمالها، وخلال السطور الجاية هنقول لكم على كل حاجة خاصة بمشروعهم الخاص بإحياء ثراث النوبة وتعليم لغتها.

المشروع اسمه “النوبة حتة مننا” وهو بيهدف لنشر الوعي بين المصريين عن النوبة وحضارتها وتاريخها ولغتها المميزة، وكمان هيكون فيه جزء خاص بأصل النوبة وارتباطها الوثيق بمصر، وبيهدفوا كمان لتعريف الجميع بعاداتهم وتقاليدهم ومعتقداتهم، ومن الأهداف كمان المحافظة على اللهجة النوبية وتعليمها لأبناء النوبة خاصة والمصريين عامة، لأنها جزء أساسي من حضارتهم وخاصة أن اللهجة دي كانت سبب من ضمن أسباب الانتصار في حرب أكتوبر 73 لما استخدمتها قواتنا المسلحة في إرسال شفرات للجنود.

المشروع عبارة عن حملة اعلامية قائم عليها 8 طالبات من الفرقة الرابعة لكلية إعلام بجامعة مصر الدولية، وهن: “فرح هيثم، حبيبة بدوى، لوچين السوهاجى، هايدى ايهاب، فريدة عمرو، ياسمين محمد، نور يونس، رودينا حسام”، والفكرة جت لهم لما عرفوا حاجات كتير مهمة عن الثقافة النوبية واكتشفوا مع البحث أن كتير من المصريين مايعرفوش حاجة عن النوبة ولغتها وحضارتها.

ومن خلال بحث الطالبات وجدوا أن كتير من شباب وأطفال النوبة مش بيجيدوا اللهجة النوبية زي زمان، وخوفًا من أنها تختفى وتندثر وتروح معاها قصص وحضارات آلاف السنين، قررت الطالبات إطلاق حملة “النوبة حتة مننا”، لتوعية المصريين باللغة والحضارة النوبية وبالفعل بدأوا في توعية الناس عن النوبة وعمل ورش عمل عن عاداتهم وتقاليدهم المميزة وتاريخ النوبة العظيم.

فتيات حملة “النوبة حتة مننا” من ضمن أهدافهم إنشاء مركز في النوبة لتعليم الأطفال اللهجة النوبية، وتشجيع المصريين كلهم أنهم يتعلموا لغة أهل النوبة، وخاصة أبناء النوبة اللي مقيمين خارجها وحابين يتعلموا لغتهم، وكمان عندهم هدف إنشاء مراكز في القاهرة لتعليم اللغة النوبية، وده بعد انتهاء أزمة فيروس “كورونا” المستجدة وعودة الحياة لطبيتعها.

وعلشان تعرفوا أكتر عن مشروع “النوبة حتة مننا” تقدروا تزوروا صفحتهم على فيسبوك من هنا.