“الهيروغليفية خطوة بخطوة”: تعلم اللغة المصرية القديمة مجانًا مع مكتبة الإسكندرية!
آثار مصر الحضارة المصرية القديمة اللغة الفرعونية اللغة المصرية القديمة المتحف المصري بالتحرير تعلم الهيروغليفية معابد قدماء المصريين مكتبة الإسكندرية موقع الهيروغليفية خطوة بخطوة
Mohamed Talaat
الصورة الرئيسية: Lea Kobal
في كل ركن من متاحف مصر العريقة، وفي كل معبد من معابد قدماء المصريين العظيمة، بتتزين الحوائط والأعمدة والتماثيل بكلمات محفورة ومكتوبة بلغة المصريين القدماء، أو زي ما بيطلق عليها البعض “الهيروغليفية”. اللغة دي مش بس حروف ورموز، دي كنز حضاري كبير بيحكي قصص وتاريخ عظيم. طيب، لو نفسك تقرأ الكلمات دي بنفسك، وتفهم المعاني اللي وراها، ومن غير ما تدفع ولا مليم، هتعمل إيه؟
مكتبة الإسكندرية العريقة بتقدم لك حل عملي ومجاني 100%!
مؤخرًا، مكتبة الإسكندرية أطلقت موقع إلكتروني مميز جدًا اسمه “الهيروغليفية خطوة بخطوة“، وده بالتعاون مع إدارة تكنولوجيا المعلومات في المكتبة، ومن خلال مركز دراسات الخطوط التابع لها.
الموقع ده يعتبر أول منصة إلكترونية تفاعلية لتعليم اللغة المصرية القديمة، بيستهدف الطلاب، والهواة، وكل حد مهتم بالثقافة الفرعونية وحابب يكتشف أسرارها.
الجميل كمان إن المحتوى العلمي للموقع متوفر باللغتين العربية والإنجليزية، علشان يناسب كل المستويات وكل الناس.
حكاية مشروع “الهيروغليفية خطوة بخطوة”
بدأت المرحلة الأولى من الموقع ده سنة 2015، ضمن مشروع طويل الأمد شغال عليه مركز دراسات الخطوط في مكتبة الإسكندرية. المشروع ده مستمر في تطوير وتحديث محتواه باستمرار، من خلال إضافة دروس جديدة، واختبارات تعليمية، وكمان نماذج أثرية حقيقية عليها كتابات مصرية قديمة. ده غير إنهم بيضيفوا بشكل دوري كلمات جديدة في القاموس الإلكتروني الموجود على الموقع، علشان يوسعوا حصيلتك اللغوية.
دلوقتي، تقدر تدخل الموقع وتبدأ تتعلم خطوة بخطوة، من غير أي تعقيد، وبشكل بسيط وسلس، وحتكتشف بنفسك جمال اللغة الهيروغليفية وسحر الحروف الفرعونية اللي لسه بتتكلم لحد النهارده.
لو مهتم إنك تبدأ رحلتك في تعلم اللغة المصرية القديمة، متفوتش الفرصة دي!
ابدأ رحلتك من هنا: موقع الهيروغليفية خطوة بخطوة
مقترح
تسوق
من هوليوود للعتبة.. سر انتشار عروسة لابوبو الغريبة اللي أصبحت تريند عالمي
Pop Mart إكسسوارات الموضة +8
فن وثقافة
