The Definitive Guide to Living in the Capital , Cairo , Egypt

مصدر جميع الصور: منصة القاهرة الإسلامية

 

القاهرة بتتميز بوجود عدد كبير من الأسبلة اللي بتحكي لنا حكايات عن تاريخ بلدنا، والسبيل هو وقف لسقي الماء لعابري السبيل والمارة، وده بيكون بشكل مجاني رغبة في الأجر. وسبيل وكُتاب السلطان قايتباي، بيعتبر من أجمل الأسبلة في القاهرة وأكثرها تميزًا.. موجود فين؟ في حي الخليفة، وحكايته إيه؟ انزل بعينك للسطر الجاي علشان تعرف.

 

سبيل وكُتاب السلطان قايتباي أنشأه السلطان المملوكي الأشرف قايتباي المحمودي الأشرفي، وده كان في سنة 1479م، يعني إحنا بنتكلم على اثر مصري إسلامي عمره أكثر من 500 سنة!

السبيل موجود في نهاية شارع الصليبة بالقرب من ميدان صلاح الدين بالقلعة، وبيُعد السبيل ده نموذج مبهر من الناحية المعمارية والفنية في العصر المملوكي، وكان السبيل بيحتوي على أربع واجهات حرة وقت إنشائه، لكن حاليًا بتحيط به المباني.

بيميز السبيل ده إنه أول أسبلة مصر الإسلامية اللي اتبنت منفردة من غير ما تكون ملحقة بمباني ثانية، على عكس معظم الأسبلة في مصر، واللي كانت بتبقى ملحقة بمؤسسات مختلفة زي المدارس والمساجد أو حتى المنازل.

بيتكون السبيل من حجرة مستطيلة الشكل، وحجرة تانية شبيهة لها في الطابق الثاني، أما الكُتاب اللي كان مخصص لتعليم أطفال المسلمين مبادئ القراءة والكتابة فموجود في الطابق الثالث.

بيتميز السبيل فعلًا بالثراء الزخرفي، وبيضم تكوينات رائعة من الزخارف النباتية والهندسية إلى جانب الكتابات، ونُفذت الزخارف دي بالحفر على الحجر والرخام.

السبيل بيحتوي كمان على رنوك باسم السلطان قايتباي.. يعني إيه رنوك؟ دي كلمة فارسيه معناها اللون، واستخدمت بمعنى الإشاره أو الشعار أو الرمز اللي بيستعمله الأمير أو السلطان فى مصر فى عصر الدوله المملوكية. الرنك ممكن يستخدم كمان للدلالة على وظيفة الأمير.

منتظرين إيه؟ سبيل وكُتاب السلطان قايتباي في انتظار زيارتكم له.