Omar Abd-elmaqsoud
محدش فينا مالوش قصة مع شخصية كرتونية أو بطل خارق كان بيتفرج عليه وبيحبه، ويمكن كنا بنحاول نقلدهم كمان، ولما كبرنا شوية، بقينا بنعلق صورهم في كل مكان، ونشتري ألعاب مجسمة، وتشيرتات وأدوات الدراسة وكل حاجة عليها صورهم.
حب الأبطال الخارقين كبر معانا لحد ما بقينا بنحجز تذاكر علشان نتفرج على أفلامهم في السينمات كل سنة، وبقينا متابعين كل حركاتهم وقصصهم في مجلات الكوميكس.. كل ده كان حماده، وحب المهندس “مصطفى يحيي” للأبطال الخارقين حماده تاني خااااالص… وفي كايرو 360 النهارده هنقولكم حكاية موهبة اسمها “مصطفى يحيي”.
“مصطفى” باختصار خريج هندسة قسم ميكانيكا، واكتشف بحسه الهندسي المرهف، إنه عنده موهبة كانت مميزة من صغره عن بقيت أصحابه، صحيح كل أصحابه بيحبوا الأبطال الخارقين، زي “اسبيدر مان” و”بات مان” و “مازنجر” وغيرهم كتير، لكن حبه هوه للأبطال دول مرتبط بشكل ما بموهبته.
بدأ “مصطفى” ياخد باله من عشقه لتصميم الشخصيات الكرتونية المختلفة، وخصوصًا الأبطال الخارقين، وبدأ فعلًا من كام سنة يعيد تصنيعها وتصميمها من خامات مختلفة زي البلاستيك وعجينة السيراميك، وكان جزء كبير من دوافع ظهور موهبة “مصطفى” دي للنور، هوه إن “مصطفى” على حبه للشخصيات دي، إلا إنه ماكانش بيلاقيها بسهولة بتتباع في محلات اللعب، وكان في شخصيات كتير مش موجودة أصلًا، ولو لقاها بتبقى فوق إمكانيات إنه يشتريها، ومن هنا جه قرار “مصطفى” بتصنيع شخصياته المفضلة بإيده.
في الأول أدوات “مصطفى” كانت بسيطة جدًا، وكانت عبارة عن ورق وكارتون ولزق وألوان، ومع الوقت، ومع مرور الأيام، بدأ مستوى “مصطفى” يتحسن ويتعلم حاجات وخبرات جديدة، زي إنه يوصل بتصميماته لإنها تكون مجسم كبير بحجم إنسان أو “روبوت” بيتحرك بالريموت كنترول.
وزي أي حد في الأول “مصطفى” ماكانش عنده النية إنه يفرج شغله لحد، لكن من خمس سنين، اتخلى عن الفكرة دي، وبدأ فعلًا يعرض منتجاته على صفحته على الفيسبوك ” MY SUPER CRAFT ” واللي وصلت دلوقتي لأكتر من 10 آلاف معجب، ما بين هواة في مجال “مصطفى” وبيتعلموا منه، وما بين معجبين بشغله.
