The Definitive Guide to Living in the Capital , Cairo , Egypt

فن وثقافة -
مقترح

بالصور.. كايرو 360 في رحلة لمعرفة الفنان اللي لون أطباق القاهرة

آرت اللوا أرض اللواء أطباق القاهرة القاهرة تجميل القاهرة جايسون ستونكينج ليزلي ماك أليستر مبادرات فنية مبادرة تلوين
بالصور.. كايرو 360 في رحلة لمعرفة الفنان اللي لون أطباق القاهرة
بواسطة
Cairo 360

مؤخرًا كنا في زيارة لمنطقة أرض اللواء الشعبية في محافظة الجيزة، اكتشفنا حاجة جميلة، لقينا كتير من بيوت المنطقة أطباق الإرسال اللي فوق سطوحها “الديش” لونها جميل على عكس ألوان الأطباق الكئيبة اللي اتعودنا نشوفها.

سألنا كتير من سكان المنطقة علشان نعرف مين اللي عمل مبادرة تلوين الأطباق فوق أسطح بيوتهم دي علشان نقوله شكرًا. كلمونا عن فنان أجنبي بس ماكنش حد فاكر اسمه، وقالوا لنا إن الشخص ده هو وصديقته قاموا بمبادرة لتجميل أطباق القاهرة لكن للأسف المبادرة دي مخرجتش من منطقة أرض اللواء تقريبًا.

طب مين يا جماعة الشخص ده وليه فكر في الفكرة دي؟ للأسف ماكنش فيه إجابة!

اكتشفنا إن الإجابة على السؤال موجودة في موقع كايرو 360 نفسه!

أيوة لقينا موضوع منشور على موقعنا من عام 2014 فيه الإجابة، عرفنا من الموضوع ده إن مبادرة تلوين سماء القاهرة صاحبها هو الكاتب الأمريكي جايسون ستونكينج اللي شاف أن منظر القاهرة ممكن يكون أجمل لو تم تلوين أطباق الإرسال. وعن طريق الاقتراح ولدت المبادرة اللي قام بها الكاتب الأمريكي وصحبته ليزلي ماك أليستر، واللي كانوا مقيمين لمدة 3 أشهر في مركز فني كان موجود في أرض اللواء اسمه آرت اللوا، لكن للأسف عرفنا إن المركز ده قفل مؤخرًا.

الكاتب الأمريكي جايسون ستونكينج قال وقتها لموقع كايرو 360 “أول ما وصلنا مصر، كانت خططنا مختلفة تمامًا، أنا كاتب وليزلي مصوّرة فوتوغرافية وفنانة، ولكن نظرًا للأوضاع الأمنية الحالية، إحنا عرفنا أنه مش من السهل علينا كأجانب أننا نمشي في الشوارع بمعدات تصوير”.

وأضاف “القاهرة لها روح خاصة بها؛ نفسي اتفاعل مع أكبر قدر من أهلها بدل القعدة على المكتب، الناس هنا مرحبين جدًا وفعلًا نفسي أرد لهم جزء من الود اللي بـ يقدموه لنا”.

أرض اللواء تعتبر واحدة من الأحياء البسيطة في القاهرة، وده سبب اختيار ستونكينج وليزلي لها كمكان للإقامة والتفاعل مع الروح القاهرية الصميمة اللي موجودة فيها.

“مافيش أسهل من أننا نكون الأجانب اللي بـ يتعرفوا على الطبقات الأرستقراطية من المجتمع المصري، ولكن دي أكثر حاجة بنحاول نتجنبها. أهل القاهرة من البسطاء مفتقدين الكثير من أساسيات الحياة، فكان علينا نعمل مشروع تكاليفه بسيطة ولكن يعمل فرق، على الأقل لو ما عرفناش نحل مشاكل الأساسيات، نقدم لهم رفاهية إضافة بُعد جمالي للمكان اللي عايشين فيه”.

وعن الصعوبات اللي واجهته لتنفيذ المشروع بيقول: “المشروع هنا تنفيذه أصعب من تنفيذه في أمريكا، هناك بنتكلم مع أصحاب الأطباق ونحدد معهم موعد لتأكيد الموافقة أو الرفض، إنما هنا الموضوع أكبر من كده بكثير… تزور أصحاب الطبق وتأخذ قهوتك معاهم وتشرح لهم الموضوع وتحدد معاهم موعد للتأكيد وما يردوش عليك في الآخر… فبنضطر أننا نقوم بإعادة الزيارة، ونبدأ من أول وجديد… اللي بيأخذ يوم في نيويورك، بيأخذ أيام وأسابيع هنا في القاهرة”.

وبالرغم من كل الصعوبات دي، المشروع نجح نجاح مبهر: “أطباق سطح المبنى اللي ساكنين فيه كان نقطة البداية، استخدمنا ألوان مبهجة زي الأصفر، والبرتقالي، والأخضر والبنفسجي. الأطفال اللي كانوا بيتفرجوا علينا من بلاكونات المباني الثانية كانوا بيشجعونا… ده لوحده شجعنا أننا نكمل”.

الكاتب سجل اللحظات الإيجابية في فيديو.

ولكل الناس اللي عجبتهم الفكرة وبيفكروا ينفذوها، ستونكينج بينصحهم أنهم يستخدموا دهانات خالية من الرصاص ومش ميتاليك –معدنية التأثير- لأنها ممكن تأثر على الإرسال، وبيفضل استخدام الألوان الفاتحة القوية علشان لونها هيظهر لمدة أطول حتى لو التراب غطاه. ده غير أنه لا يحبذ دهان الجسم المعدني الحامل للطبق.

للأسف الكاتب وصديقته سابوا مصر، لكن ألوانهم الجميلة لسة شاهد على زيارتهم للقاهرة.

من فريق كايرو 360 للكاتب الأمريكي جايسون ستونكينج وصديقته ليزلي: شكرًا على هديتكم المبهجة للقاهرة.

 

مقترح