The Definitive Guide to Living in the Capital , Cairo , Egypt

تخيلوا إن عندنا في مصر متحف مخصص لعرض وحفظ فن “الكاريكاتير”؟ لأ وكمان يعتبر أقدم متحف للكاريكاتير في الشرق الأوسط كله؟! طايب إيه رأيكم نحكيلكم عن رحلتنا في كايرو 360 لـ “متحف الكاريكاتير” في قرة تونس في مدينة الفيوم.

مبدئيًا المسافة من القاهرة للمتحف حوالي 120 كيلومتر، وقرية تونس اللي موجود فيها المتحف، هي قرية ليها طبيعة خاصة، وبيوتها كلها دور واحد، ومبنية بالطوب اللبن.

مؤسس المتحف وصاحب فكرته واللي قام بإنشاؤه بمجهوداته الشخصية هو الفنان التشكيلي “محمد عبلة” وفي سنة 2009 تم الافتتاح، وكان وراء الفكرة في إنشاؤه أصلاً هو مقابلة حصلت بين “عبلة” والفنان الراحل “زهدي العدوي” رئيسى جمعية فناني الكاريكاتير السابق، وقاله إنه لو الرسامين احترموا فنهم، ساعتها بس هيحافظوا عليه، وفعلًا قرر “عبلة” إنه ينشئ المتحف ده، علشان يبقى أول وأقدم معرض متخصص في عرض فن الكاريكاتير في مصر والشرق الأوسط وأفريقيا.

 أهم حاجة بتميز المتحف هو إنه بيضم رسومات من مجلات دورية صدرت سنة 1919 وكانت متخصصة في الكاريكاتير بس، زي مجلات الشعلة، والكشكول، واضحك، والجيل الجديد، ده غير إنه بيضم أكثر من 500 لوحة كاريكاتيرية من بداية القرن العشرين لحد النهارده.

شارك في المتحف ده عشرات الفنانين، بلوحات وأعمال أصلية، وبتتناول تعليقات ساخرة على موضوعات مختلفة، سواء في السياسة أو في الفن أو في الاجتماع،ده غير إن اللوحات أو الأعمال دي موقعها من أصحابها اللي بقوا أسماء مهمة في فن الكاريكاتير في العالم العربي، زي الفنان والشاعر صلاح جاهين، وجورج البهجوري، وصاروخان، ورخا، وحجازى، وزهدى، وطوغان، وعمالقه كتير غيرهم.

دخول المتحف مجاني، ولو حابين تعرفوا معلومات أكتر عن المتحف ومواعيده، ممكن تدخلوا على صفحته على الفيسبوك من هنا.