The Definitive Guide to Living in the Capital , Cairo , Egypt

بعد ثورة 25 يناير، انتشر فن “الجرافيتي”، وبقت معظم شوارع مصر مرسومة بيه، ولكن كانت كل الرسومات “عشوائية”، وكمان مفيش تنسيق “حضاري”، ممكن يخليها تبقى علامة بارزة تتجمل بيها شوارع القاهرة، ده غير الكتابة العشوائية في الشوارع اللي شوفت الحوائط، زي مدرس بيعلن عن دروس خصوصية يكتب على الحيطان، وحبيب بيجامل حبيبته، وهكذا.

 

فادي عبد المسيح، شاب مصري، 25 عام، مهندس معماري، عنده فكرة مبتكرة يجمل بيها القاهرة من تاني، ويزيل آثار العوامل الطبيعية والإنسانية، على حيطان البيوت القديمة خصوصاً في القاهرة الفاطمية.

فادي بيقول لـ”كايرو 360″، أن الفكرة جات له به لما تخيل كل شوارع مصر حيطانها مرسومة بالفن القبطي والروماني والبيزنطي القديم، وفعلًا قرر أنه يدور على الصور بتاعتهم، واستخدم برامج التصميمات، وبدأ ينفذ فكرته اللي بيتمنى تتطبق والمسئولين يوافقوا عليها، لأنه شايف أن دا هيزود جمال الشوارع، وهتيقى متحف مفتوح، ومع مرور الزمن الحوائط هتبقى أثرية وقيمتها تزيد.

وكمان فادي بيتمنى إن الناس لما تشوف الرسومات دي تقرأ معلومات عنها، علشان تعرف قصتها وتاريخها، “لو الرسومات عجبت الناس أكيد هيدوروا على أصل وتاريخ كل رسمة، ويستمتعوا بيها، ويعرفوا كل تفصيلة فيها”.

 

كايرو 360 تواصلت مع المهندس محمد أبوسعدة، رئيس الجهاز القومي للتنسيق الحضاري، بصفته متخصص بالحفاظ على “جمال القاهرة”، ومبانيها، وبعتنا له نماذج من رسومات فادي، ورحب بيها وطلب أن يقابله في مقر الجهاز لعرض الفكرة كاملة علشان ينسق معاه تنفيذ المشروع.

نتمنى الفكرة تتنفذ فعلًا.. ونشوفها على حوائط القاهرة.