The Definitive Guide to Living in the Capital , Cairo , Egypt

إمبارح الأربعاء كان يوم استثنائي لكتير من عشاق فن نادر وأصيل موجود عندنا في أم الدنيا، إمبارح سجل تاريخ الفن ده اعتزال واحد من أساطيره اللي صحيح لا الفن ده كان من قبله مجهول، ولا من بعده هيبقى مهجور، لكنه كان علامة فارقة، وأثرت في عشاق قدام للفن ده، وضاف له محبين جداد.

امبارح كان اعتزال “عادل يوسف” أو الشهير بـ “عم عادل” عازف الطورة أو “الصاجات” في واحد من أميز العروض الفنية الفولكلورية النادرة، عرض التنورة، واللي بيتقدم على مسرح قبة السلطان الغورى في القاهرة، اعتزل عم عادل في يوم عيد ميلاده الـ 60 يوم الاربعاء 13 مارس.

فرقة “التنورة التراثية المصرية” اللي كان عم عادل عضو فيها، اتأسست سنة 1987 يعني من 31 سنة تقريبًا، وهي دي المدة اللي قضاها عم عادل تحت قبة الغوري، وبين أعضاء الفرقة واللي كان بيعتبر أقدم واحد فيها وضابط إيقاعها.

التنورة كفرقة حققت نجاحات كبيرة على المستوى المحلي والعالمي، وعم عادل كمان شهرته عوصلت للعالمية، وكان سبب في شهرة وازدهار الفن ده في مصر والعالم، حتى إنه يعتبر رسول الفن ده في العالم، وأيقونة “التنورة”.

نتمنى في كايرو 360 لعم عادل ولكل أعضاء فرقة التنورة دوام النجاح والتوفيق في رسالتهم وفنهم وحياتهم.