The Definitive Guide to Living in the Capital , Cairo , Egypt

الصور من صفحة “غالية بنعلي” على الفيسبوك

في الفترة الأخيرة حققت الفنانة التونسية “غالية بنعلي” نجاح كبير في مصر، وأصبح جمهور حفلاتها في القاهرة بيزيد يوم عن يوم، ومؤخرًا راديو “إنيرجي 92.1″، استضاف غالية في حلقة خاصة اتكلمت خلالها عن مشوارها الفني، وكشفت الكثير عن حياتها الخاصة والفنية.

وقالت غالية، خلال استضافتها في برنامج “فوّل 92.1” مع باسم كميل إن والدها هو اللي اختار لها اسم غالية، بسبب إنه كان اسم جدتها الراحلة، مؤكدة إن كتير من محبيها اختاروه لبناتهم وهو أمر أسعدها جدًا.

وسأل كميل غالية عن لقبها المفضل، فأكدت إنها مابتفضلش لقب سفيرة الغناء العربية، لأنها شايفة إن فيه كتير من الفنانين يستحقوا اللقب ده، وقالت إنها بتحب لقب “سفيرة الثقافة العربية”، و”الغجرية بنت الريح”، و”البربرية” لأن أصلها بربري وأمازيغي.

وكشفت “غالية بنعلي” إن لقب سفيرة الثقافة اللي حصلت عليه في فرنسا، بيعني أنها بالنسبة لهم سفيرة عن الثقافة العربية كلها مش الغناء والفن بس، وإن اللقب ده بيشمل الطبخ والطعام والديكورات والحكايات والنوادر، زي ما وضحت لباسم كميل.

وأضافت على إنيرجي، أنها بتحب حياة البربر، والترحال والحركة، ومن صغرها بتعشق فكرة الغجر والحرية اللي بيعيشوا بيها.

وقالت “غالية بنعلي”، إنها بتحب موسيقى الفلامنكو جدًا، وحكت عن حبها للهند، وشغفها من وهي صغيرة بالسفر.

وقالت غالية إن مصر بالنسبة لها عشق خاص، وأكدت لإنيرجي، أنها من أول مرة زارت فيها مصر اتعلقت بيها جدًا، لأنها بتجمع بين ثقافة الهند وتونس، وأصبحت أحلى مكان بالنسبة لها، خاصة أنها من طفولتها اتربت على مشاهدة الأفلام والمسرحيات المصرية، وسماع القرآن بالقراءة المصرية.

وكشف “غالية بنعلي” لبرنامج “فول 92.1″، إن أم كلثوم ساهمت بشكل كبير في تعليمها الغناء وعظمة الموسيقى، وفي صغرها كانت بتستمع ليها بإنصات، وكمان كانت بتستمع بتركيز شديد للقرآن بصوت الشيخ عبد الباسط عبد الصمد.

ووصفت “غالية بنعلي” صوت أم كلثوم بأنه صوت رباني، وبحسب وصفها “لو كان ربنا عنده صوت هيشبه صوت أم كلثوم لأنه لا رجالي ولا حريمي فهو صوت قوي قادم من السماء”.