The Definitive Guide to Living in the Capital , Cairo , Egypt

رحلت عن عالمنا إمبارح واحدة من جميلات السينما المصرية اللي قدمت أدوار فيها تراجيديا وكوميدية وكل أنواع الدراما، الممثلة الجميلة مديحة يسري اللي عاشت آخر سنواتها في صراع كبير مع المرض لحد ما رحلت في هدوء.

مديحة يسري من مواليد 1921 واكتشفها المخرج محمد كريم أول مخرج في تاريخ السينما المصرية واختارها تقدم فيلم “ممنوع الحب” أمام عبد الوهاب سنة 1940، شاركت بعدها في أفلام كتيرة نجحت وقتها زي النائب العام واليتيمة وقدمت اتنين من أهم كلاسيكيات السينما المصري فيلم ” إني راحلة” مع الفنان عماد حمدي وفيلم “لحن الخلود” مع فريد الأطرش وفاتن حمامة، كمان عملت دويتو جميل مع المطرب محمد فوزي لما قدموا سوا فيلم “معجزة السماء – قبلة في لبنان – فاطمة وماريكا وراشيل”.

مديحة يسري اشتغلت مع أجيال كتير بداية من محمد عبد الوهاب لحد عادل إمام اللي ظهرت معاه في فيلم “الإرهابي”، كمان ماحدش ينساها أبدًا في مسلسل “هوانم جاردن سيتي” الجزء الأول والتاني لما قدمت شخصية خديجة هانم.

قدمت مديحة يسري في تاريخها حوالي  90 فيلم، وعلى مدار حياتها الفنية كانت معروفة بقربها من السيدة أم كلثوم لدرجة إنها اعتبرتها الصديقة الأقرب ليها وحكت في مرة إن أم كلثوم كان معجبة جدًا بالفساتين بتاعتها وطلبت منها تروح معاها للترزي اللي بيفصلها عشان تتعامل معاه، ورغم إنها اتجوزت 4 مرات إلا أنها قالت في آخر أيامها إن كل أزواجها خانوها ما عدا الفنان أحمد سالم زوجها التاني، أحمد سالم مؤسس ستديو مصر واللي كان متجوز قبلها أسمهان واتٌهم بمحاولة قتلها، بعد انفصالها عنه اتجوزت الفنان محمد فوزي اللي وقفت جنبه كتير عشان يأسس شركة الأسطوانات الخاصة بيه ووقفت جنبه أربع سنين أثناء مرضه نتيجة حزنه على تأميم الشركة اللي أسسها سنة 1958 باسم “مصر فون” لتصبح بعدها شركة صوت القاهرة للصوتيات ، وكان ليها منه ولد توفى في حادث سيارة من سنين.

من أكتر المواقف الصعبة اللي اتعرضت لها مديحة يسري كانت تأميم فيلتها في شارع الهرم اللي كانت على مساحة فدانين، وقتها تم بيع الفيلا لشخص غير مصري وهي لم تحصل بعد تأميمها غير على 25 ألف جنيه.

توفت الجميلة مديحة يسري “سمراء النيل” عن عمر 97 سنة بعد ما قدمت أعمال هتفضل خالدة في تاريخ السينما المصرية.