The Definitive Guide to Living in the Capital , Cairo , Egypt

وسط كل الزحمة والالتزامات، ممكن الاستعارة من المكتبة تبقى سهلة.. لكن إعادة الكتب؟ ساعات بتبقى مهمة صعبة، خصوصًا لكبار السن أو الناس اللي ظروفهم مش بتسمح بالتنقل.

علشان كده، مكتبة مصر العامة الرئيسية بالدقي قررت تطلق خدمة جديدة وذكية تحت اسم “بوك دليفري” بالتعاون مع شركة شحن، علشان تسهّل على الناس إعادة الكتب المعارة من غير ما يضطروا يروحوا المكتبة بنفسهم.

الفكرة ببساطة:

لو أنت من أعضاء المكتبة وعندك كتب عاوز ترجعها، دلوقتي تقدر تنسق ده بكل سهولة عن طريق الواتساب. هتبعت اسمك، عنوانك، رقم الموبايل، رقم الكارنيه، وعدد الكتب. الموظف المختص هيجمع البيانات، ويبعتها لشركة الشحن اللي هتيجي لحد عندك وتستلم الكتب مقابل رسوم رمزية.

الخدمة مش بس مريحة، لكنها كمان منظمة جدًا:

الكتب بتتسجل إلكترونيًا بمجرد وصولها المكتبة.

في متابعة دقيقة لضمان سلامة الكتب ومواعيد الاستلام.

والمستفيدين من النظام الفردي أو العائلي كلهم يقدروا يشتركوا.

وده كله بيحصل أسبوعيًا بنظام منظم بيحافظ على حق المكتبة، وبيشجع على ثقافة الاستعارة المسؤولة من غير تعقيد.

لو حابب تشترك في الخدمة، تقدر تبعت على الرقم: 01018044202.

والموظف المختص هيكلمك ويرتب معاك كل التفاصيل.

نبذة عن المكتبة:

مكتبة مصر العامة مش مجرد مكان للاستعارة، دي واحدة من أكبر وأهم المكتبات العامة في مصر، اتأسست سنة 1995 بالتعاون ما بين وزارة الثقافة ومؤسسات ألمانية ومصرية، وكانت خطوة ثقافية كبيرة بقيادة السفير عبد الرؤوف الريدي.

رؤية المكتبة واضحة: “المكتبة مش مجرد مبنى، لكنها رسالة ورؤية بتتفاعل مع الناس”. ومن يوم افتتاحها، وهي بتشتغل على نشر الثقافة، وتنمية عادة القراءة، وتوفير مصادر تعليمية وثقافية لكل الفئات والأعمار.

ومع التطور التكنولوجي، المكتبة دخلت على خط العصر، وقدمت خدمات جديدة لتواكب احتياجات الجمهور، ومن ضمنها خدمة “بوك دليفري” اللي بتفتح الباب قدام ناس كتير ترجع تستفيد من المكتبة بأبسط الطرق.

العنوان:

مكتبة مصر العامة – الدقي، الجيزة.

للاستفسار عن الخدمة: 01018044202.