The Definitive Guide to Living in the Capital , Cairo , Egypt

بالتأكيد كلنا سمعنا عن “أمنا الغولة”، الشخصية الخرافية اللي أهالينا كانوا بيحكوا لنا عنها في طفولتنا، السيدة بشعة الوجه اللي بتخرج من معابد الأقصر وتموت أي كائن حي يقابلها.. لكن حاليًا تقدروا تقابلوا “أمنا الغولة” في متحف مطار القاهرة الدولي حاليًا.. إزاي؟ التفاصيل في السطور الجاية.

بحسب معلومات نشرتها مؤخرًا الصفحة الرسمية لمتحف مطار القاهرة الدولي على الفيسبوك، فقصة “أمنا الغولة ” مرتبطة بواحدة من آلهة المصريين القدماء، وهي الآلهة “سخمت”، آلهة الحرب والدمار والفزع، وفي نفس الوقت هي آلهة الطب، وهي عين الإله رع.

وهي بتظهر في صورة امرأة آدمية ورأس لبؤة “أنثي الأسد”، وهي اللي بتسبب المرض وهي كمان اللي بتعالجه، أما عن سبب ارتباطها باسم “أمنا الغولة”، فالحكاية بدأت من سنين طويلة، لما اكتشف عالم الآثار الفرنسي “چورچ ليجران” في يوم 26 ديسمبر سنه 1903 واحده من أكبر خبايا مصر كلها وهي “خبيئة الكرنك”، ووقتها خرجوا من تحت الأرض أكثر من 8000 تمثال، وكان في نفس الوقت فيه 7  أطفال بيلعبوا بالقرب من الكرنك بجوار حائط أثناء الحفر بمعبد الكرنك فوقع الجدار عليهم.

وتزامن موت الأطفال مع العثور على تماثيل للآلهة “سخمت”، وده ساهم في انتشار قصة “أمنا الغولة” اللي موتت الأطفال، وانتشر وقتها إنها بتخرج بالليل من معبد الكرنك علشان تموت الأطفال، ووجه الآلهة “سخمت ” اللي بيمثل رأس اللبؤة المخيف ساعد على انتشار القصة دي، وامتنع عمال الحفر عن العمل في المعبد بسبب الخوف من لعنة “سخمت”.

لكن في الوقت ده نجح الباحث الآثري جورج ليجران الفرنسي في تغيير الاعتقاد ده من داخل قلوب العمال والأهالي، بعد ما ادعى إنه ألقى تعويذة بالهيروغليفية علشان ينهي أسطورة “سخمت”، وبالفعل صدقه أغلب عمال الحفريات وقتها ونشروا في البلاد إنه تم إنهاء أسطورة “أمنا الغولة”.

وبيعرض متحف مطار القاهرة الدولي بمبنى٣، تمثال للمعبودة “سخمت” بيرجع لعصر الدولة الحديثة، تقدروا تشوفوه في المتحف.

عنوان المتحف: صالة ٣ – مطار القاهرة الجوي.

مواعيد الزيارة: مفتوح ٢٤ ساعة كل أيام الأسبوع.

أسعار التذاكر: ( 3 دولار أو 25 ج) للمصريين والأجانب.