The Definitive Guide to Living in the Capital , Cairo , Egypt

الصورة ذكرى جميلة للحظة بيبقى نفسنا ماتعديش وتخلص، فبنمسك فيها بـ “صورة” تفكرنا بيها كل فين وفين، ومع بدايات التصوير، كان الحصول على صورة معينة في لحظة معينة موضوع مش سهل خالص، يمكن علشان الكاميرات ساعتها كانت أحجامها ضخمة، والتقنية المستخدمة فيها على القد، ومع ذلك كانت الناس بتصر تتصور، علشان تمسك في اللحظة وتسجلها، وتحافظ على الذكريات.

مع مرور الوقت، وتطور التكنولوجيا، بقى التصوير موضوع سهل جدًا، وبقى تسجيل اللحظة من أسهل الحاجات اللي ممكن نعملها، لكن فضل هاجس استعادة الذكريات القديمة، من صور عدى عليها الزمن، بيسيطر على أفكار ناس كتير، ولإن غلاوة الصورة من غلاوة الذكرى، بقينا بنحتفظ بالصور القديمة حتى لو مش واضحة أو مقطوعة أو فيها عيوب طباعة أو أي مشاكل، لإن كفاية الذكرى اللي بنعيشها كل ما بنبص فيها، وأهي على رأي الهضبة “أي حاجة تيجي من ريحة الحبايب”.. لحد ما جه تطبيق “ريميني –  Remini” وكل حاجة اتغيرت.

التطبيق الجديد رجع الحياة لصور ولقطات من زمن فات بقدرته الكبيرة على تحسين أي صورة قديمة مهما كانت، ومهما كان الضرر اللي حصل لها، وبيرجعها صورة عالية الجودة وواضحة بشكل مبهر وجميل.

كتير من الناس على وسائل التواصل الاجتماعي، نشروا صور ليهم أو لحد من قرايبهم، بعد تعديلها بـ “ريميني –  Remini” اللي بيعتمد في شغله على تقنيات الذكاء الصناعي، واللي بيساعده في تحويل أي صورة متضررة أو قديمة، لصورة جديدة بجودة عالية (HD).

ومن هنا بدأت الناس تجيب صور قديمة لفنانين كبار فارقوا دنيتنا، وعيشنا معاهم ذكريات جميلة في طفولتنا، زي “ليلى مراد” و أنور وجدي” و”إسماعيل ياسين” وانتشرت خلال أيام بسيطة صورة على الفيسبوك بتجمع النجوم التلاتة دول في لقطة من فيلم “ليلى بنت الفقراء” وكأنهم متصورينها بكاميرا احترافية، وجودتها كانت حلوة جدًا، بعد ما تم تعديلها بـ “ريميني –  Remini”.

بداية ظهور التطبيق كانت في 21 يونيو 2019 وكانت موفقة جدًا، ووصل عدد اللي حملوه لحوالي مليون شخص، وممكن للمستخدم الاشتراك في التطبيق مجانًا أو شرائه، وفي حالة الشراء بيكون عندك فرصة تصلح وترمم وتعدل عدد غير محدود من الصور ومقاطع الفيديو يوميًا، وبشكل أسرع من النسخة المجانية المتاحة.

ممكن تستمتعوا بتطبيق “ريميني –  Remini” على Google Play لو تليفوناتكم أندرويد من خلال تحميله من هنا.

ولو كانت تلفوناتكم Apple وبتشتغل بنظام iOS فممكن تحملوه من App store من هنا.