The Definitive Guide to Living in the Capital , Cairo , Egypt

التمثال الجديد اللي تم نصبه في طريق مصر الإسكندرية الصحراواي وبالقرب من المتحف المصري الكبير بقى حديث السوشيال ميديا الساعات اللي فاتت.

التمثال من تصميم الدكتور ضياء عوض، أستاذ النحت بكلية الفنون الجميلة بجامعة المنيا، واللي أكد في تصريحات خاصة لكايرو360 إنه بيعتبر أطول تمثال في مصر بطول 27 متر.

الصور اللي انتشرت سببت حالة من الجدل؛ فيه ناس شافت إن التمثال عمل فني ضخم ومختلف وبيليق بالمكان، وفيه ناس تانية اعتبرت إن تصميمه محتاج مراجعة. لكن في كل الأحوال، التمثال شد الانتباه وخلى الكل يتكلم عنه.

الدكتور ضياء أوضح إن الفكرة مستوحاة من بيئة الأهرامات والمتحف المصري الكبير، والتصميم عبارة عن ثلاثة أهرامات بيخرج منها تمثال بملامح مصرية قديمة، وده استغرق حوالي 8 شهور من العمل المتواصل في التصميم والتنفيذ.

ما يفوتكش كمان: المتحف المصري الكبير يفتح أبوابه في نوفمبر.. كل اللي محتاج تعرفه قبل الافتتاح

وأكد كمان إن التمثال بيعتمد على دمج بين أسلوب النحت المصري القديم والحديث، وهي تجربة صعبة ومثيرة للجدل، لكنها في النهاية بتقدم رؤية فنية جديدة. وأكد إنه لسه لحد دلوقتي، ما فيش اسم رسمي اختاره للتمثال.

سواء كنت من المؤيدين أو المعارضين، التمثال ده قدر يحقق هدف مهم؛ إنه يخلي الفن موضوع نقاش واهتمام عام.