The Definitive Guide to Living in the Capital , Cairo , Egypt

ساعات بنحس بالزهق لما بنبص لحوائط بيوتنا وبنلاقيها فاضية ومافيهاش أي إبداع، وبيكون الحل إننا نشتري لوحة فنية نعلقها.. لكن إيه رأيك إنك تحول الحوائط نفسها للوحات فنية جميلة؟ ده باختصار هو الهدف من مشروع “فالحيطة” الفني، اللي مش بس بيساعدكم على تحويل الحوائط للوحات فنية لكنه كمان بيقدم لكم رسومات على القماش والورق وأفكار أكتر، وإحنا في “كايرو 360” هنقول لكم على حكاية المشروع ده، من خلال السطور الجاية.

مشروع “فالحيطة” متخصص أكتر في رسم الشخصيات، زي نجوم كرة القدم والممثلين والممثلات والمطربين والمطربات، وده بيكون عن طريق خامات فنية قوية تستحمل الشمس وتعيش فترات طويلة على الحوائط.

ورحلة صناعة عمل فني عندهم بتكون من خلال عمل الرسمة على الفوتوشوب والإليستريتور، وبعد ما العميل يوافق على الرسمة بيبدأ تنفيذها على المكان مهما كان، سواء كان حائط أو قماش، أو أي وسيلة تانية، ولو الرسمة هتكون على الحائط بيستخدموا مادة مخصصة علشان الرسمة تعيش على طول ومتتأثرش بأي عوامل.

الفنان عبد الرحمن علي هو مؤسس مشروع “جت عالحيطة”، وهو خريج قسم آداب جغرافية، وبدأ يرسم من 2005، وأخد جوائز كتير في الرسم من مصر ومن مؤسسات خارج مصر، وكمان أخد جائزة الإبداع الفني من جامعة المنوفية سنة 2011، ودرع أول فني في مهرجان أنتيكا عام 2016.

عبد الرحمن قرر من البداية إن إبداعه يكون موجه للناس في كل محافظات مصر، علشان يخلي المصريين يحبوا الفن ويحترموه، وله أعمال فنية في أغلب محافظات مصر، زي الإسماعيلية والشرقية والإسكندرية والمنوفية والغربية والدقهلية وقنا، وطبعًا القاهرة.

أما عن الأسعار اللي بتقدمها صفحة “فالحيطة” فهي بتبدأ من 250 جنيه، لكنها ممكن تقل كل ما زاد عدد الرسومات المطلوبة، وتقدروا تعرفوا أكتر عن الرسومات والأسعار من خلال زيارة صفحة الفيسبوك الخاصة بالمشروع من هنا.