The Definitive Guide to Living in the Capital , Cairo , Egypt

وأنت ماشي في شارع 200 الهادي في المعادي هتشدك مزيكا جاية من بعيد، هتدخل جوه روحك وتاخدك ناحيتها، حاجة عاملة زي النداهة كده، وأول ما توصل عند مدخل المكان يبدأ شكله يشدك أكتر وهتلاقي نفسك داخل من باب جرامافون – Gramaphone.

جرامافون عبارة عن Community center جواه Art Space وكمان Co-working space، يعني 3 حاجات في حاجة واحدة، أصحابه مي وميار اللي بدأوا في رمضان 2016 لكن في الوقت القصير ده قدموا خدمات وأنشطة لأهل المعادي وكل مريدين المكان وبقى معروف خاصة بكورسات الـ Meditation واليوجا وحلقات الدرامز Drum Circle، حتى في يوم الهالويين اللي فات عملوا ليلة حكي كلها كانت قصص رعب في رعب.

بعد ما تدخل من الباب هتلاقي بره جنينة فيها كراسي وترابيزات من الخشب قعدتها حلوة جدًا، وعلى الحوائط رسومات لجرامافون كبير ومايك زي الجرافيتي، جوه فيه غرفتين للمذاكرة والقراءة وغرفتين للورش التعليمية وصالة رئيسية مخصصة للحفلات فيها مسرح صغير، ومطبخ صغير بيقدم مشروبات وأكل خفيف بأسعار لطيفة في متناول الجميع، أمير عزت هو مدير المكان، متعاون جدًا لو عندك أى استفسارات بخصوص الإيفنتات أو الأنشطة، وبيساعده مصطفى خالد.

طيب اشمعنى اسم جرامافون؟

آلة الجرامافون كانت أول آلة مبتكرة اتعملت علشان تطلع مزيكا وفن وصوت للناس، فالفكرة أن المكان عاوز يرجع للأصالة بس بطريقة مودرن وبشكل بسيط زيه زي بساطة الآلة دي، الصوت بيخرج من غير كهربا، حتى أن المكان قرر أن الفنانين اللي بيغنوا فى الإيفنتات بيغنوا بصوتهم عادى من غير ميكروفون أو سماعات، فالناس بتسمع صوت نقي خارج من الفنان مباشرة.

طب إيه الأنشطة اللي ممكن تعملها هناك؟

ممكن مغنيين أو فرق مسرح يعملوا بروفات أو قعدات ترابيزة شاملة مشروب، لكن لو حد عاوز غرفة خاصة به، لو العدد صغير (3 أشخاص) التكلفة 20 جنيه أول ساعة، وتاني ساعة بـ 10 جنيه، لكن أكتر من 3 أشخاص الساعة بـ 70 جنيه ولهم مشروب واحد في الساعة.

لو حد عاوز ييجي يعمل Session ممكن تأجر مساحة أو جرامافون بيساعدوك فى تأجير المكان النص بالنص علشان لو الشخص خايف أنه ممكن الناس ما تجيش، ولو أنت مدمن أفلام وعاوز تلم أصحابك وتعملوا Movie Night ممكن تعمل حجز خاص لكم، فيه هناك شاشة وبروجكتور وهتدلع نفسك وصحابك، ودي تكلفتها 30 جنيه للفيلم/ للشخص، وبرضه لو عندك موهبة الغناء وعاوز تتجمع مع أصحابك بس وتغنوا Karaoke تكلفتها 30 جنيه للساعة.

الإيفنتات الجاية:

فى أبريل بدأوا يعملوا احتفالات الـ International Day وده بيكون فيه تبادل ثقافي مع دول وثقافات تانية، فيه كمان حاجة لطيفة، عاملين يوم لمعالجة المدمنين، والمقصود بالإدمان هنا مش المخدرات، لأ أي حاجة الشخص مدمن عليها فبيستضيفوا دكتور نفسى يعلم الناس يخرجوا بره ده إزاي، واللي حابب يحكي تجربته مع الإدمان.

دايمًا موجود عندهم إيفنتات ثابتة زى الـ Mediation واليوجا وكمان حلقة الدرامز Drum Circle المسؤولة عنه رانيا عمر، وكمان بيقدموا كورسات طبلة وجيتار مع ياسر حشيش، وعود وكمان، ورسم بكل أشكاله، وخط عربي، وطباعة على المنسوجات أو الباتيك.

المفاجأة بقى أنهم هيعملوا Open Mic فى أبريل، يعني لو أنت بتغني أو بتعزف أو عندك مهارة الحكي أو Stand-Up Comedy، روح هناك وعبر عن موهبتك، لأن من خطتهم كمان أنهم يبقوا رعاة للمواهب دي في المستقبل ويعملوا تدريب وتأهيل ويعملوا لهم حفلات سواء داخل أو خارج جرامافون.

لو أنت فنان عاوز تعمل حفلة أو ورشة أو عاوز تستفسر عامة عن أنشطة المكان ممكن تتواصل معاهم من خلال صفحة الفيسبوك، وتابعوهم لأنهم عاملين مفاجأة قريب هيبدأوا عروض مسرح عرايس ماريونت للأطفال.