The Definitive Guide to Living in the Capital , Cairo , Egypt

معرض القاهرة الدولي للكتاب 2024 هو أكبر حدث ثقافي في مصر والوطن العربي، بيشارك فيه 1200 دار نشر بخلاف الهيئات والمؤسسات الحكومية، وشعار السنة دي “نصنع المعرفة.. نصون الكلمة”، وفي ظل الظروف الاقتصادية الحالية وغلاء الأسعار، كان مهم نقدم لكم 7 نصائح ممكن تفيدكم في زيارة المعرض اللي بيقام في الفترة من 24 يناير وحتى 6 فبراير 2024 بمركز مصر للمؤتمرات والمعارض الدولية.

1 – مهم تحددوا أنتم محتاجين تشتروا إيه من الكتب، وتكتبوها في ورقة خاصة ويكون ترتيبها حسب أهميتها، وده علشان الميزانية تكون محكومة ومعروف متوسط الإنفاق هيكون في حدود كام، وده هيحيمك من عملية شراء الكتب اللي غالبًا هتتركن بعد كدة في البيت ومش هتقرأها.

2 – ممكن تتوجهوا للمعرض عن طريق وسائل المواصلات العامة المنتشرة في أغلب مناطق القاهرة، واللي هتوصلكم لحد باب المعرض بسعر رخيص، وده هيخليكم توفروا فلوس المواصلات الخاصة زي أوبر وغيرها وتشتروا بها كتب.

3 – مهم تلبسوا ملابس مريحة ومهم يكون معاكم حاجة تقيلة علشان الليل ولكن خلوا ملابسكم قطنية ومريحة أثناء النهار لأنكم من كتر الزحمة واللف هتحسوا بالحر والفرهدة، وماتنسوش تأخذوا معاكم مياه وعصير.

4 – أول زيارة لمكان في المعرض خلوها مكتبات الهيئة العامة للكتاب ولقصور الثقافة والمركز القومي للترجمة ودار الهلال وغيرهم من المكتبات والمؤسسات الحكومية لأنهم أفضل ناس بيقدموا خصومات على كل حاجة والأسعار ممكن تبدأ من جنيه واحد! ودي النصيحة الرابعة.

5 – لما تحددوا اليوم اللي رايحين فيه اعرفوا أهم حفلات التوقيع والندوات والفعاليات الموجودة في اليوم ده وحددوا لو أنتم حابين تحضروا حاجة ليها اهتمام عندكم واعرفوا التوقيت والمكان علشان تروحوا بدري وتلاقوا مكان.

6 – استعينوا بفريق المتطوعين الموجود في كل مكان في المعرض علشان يساعدكم في تحديد أماكن دور النشر والفعاليات وأكثر.

7 – خدوا معاكم شنطة تتحمل تشيل الكتب لأن دار النشر شنطها بلاستيك ووغير مريحة في المسكة ومش بتتحمل، وبالتالي هيكون ارهاق لكم لو الشنطة اتقطعت.

 

وأخيرًا.. استمتعوا بزيارة معرض القاهرة الدولي للكتاب 2024 واستمتعوا بكل لحظة هناك وماتنسوش تحافظوا على المكان ومترهقوش عمال النظافة اللي بيكون عليهم ضغط كبير خلال أيام المعرض.