The Definitive Guide to Living in the Capital , Cairo , Egypt

تاريخنا كمصريين دايمًا مختلف عن غيره، وده بيرجع لإنه مليان قصص وحكايات لحد النهارده بنكتشف فيها وبنحكيها، ولحد النهارده برده ماخلصتش، وفي سكة الإكتشافات المبهرة دي، قررت مكتبة الكتب النادرة والمجموعات الخاصة في الجامعة الأمريكية في القاهرة الجديدة استضافة معرض بيحكي حكاية من تاريخنا، بعنوان “الأميرة فوزية: التباين في رؤية وسائل الإعلام الغربية والمحلية للمرأة المصرية”.

الأميرة فوزية، تبقى بنت الملك فؤاد الأول، وأخت الملك فاروق، وزوجة شاه إيران أيامها “محمد رضا بهلوي” وارتبط اسمها دايماً بجمال الستات المصريات الأرستقراطي في الحقبة الملكية، وده لإنها جمعت بين جمال الشكل والروح وبين السلطة والجاه، وبكده بقت مُلهمة لأجيال فاتت.

المعرض اللي بتستضيفه مكتبة الكتب النادرة والمجموعات الخاصة في الجامعة الأمريكية، هيستمر لحد 31 أكتوبر الجاي، هيكون متزامن مع الذكرى السنوية السادسة لوفاة الأميرة فوزية، وهيحكي عن بعض تفاصيل حياتها، وبالتالي هنستكشف مع بعض حقبة تاريخية مهمة في التاريخ المصري.

هيتناول المعرض رؤية وسائل الإعلام المصرية والدولية للمرأة المصرية من خلال حياة الأميرة فوزية، ودي رؤية مختلفة لاستكشاف وتسليط الضوءعلى الفترة التاريخية دي، وهيكون معتمد بشكل أساسي على بحث أرشيفي قامت به الباحثة المصرية الأمريكية “جنى أمين” الدارسة في أكاديمية ميلتون بولاية ماساتشوستس في أمريكا.