The Definitive Guide to Living in the Capital , Cairo , Egypt

فيه أغاني مصرية نجح الفيديو كليب بتاعها يورينا جمال وعظمة مصر.. وبقصد أو بدون قصد نجحت الأغاني دي تكون أقرب لحملة سياحية بتوري للجميع جانب مهم من المشاهد البصرية المبهرة في بلدنا، وكشفت لنا كل الجمال المستخبي.. تعالوا نتعرف على خمسة من الأغاني دي:

القاهرة – عمرو دياب ومحمد منير

بما إننا موقع متخصص عن الحياة في القاهرة فلازم نتكلم عن أغنية القاهرة للفنان عمرو دياب واللي شاركه في غنائها المطرب محمد منير.. الإغنية دي ورتنا مشاهد حلوة من العاصمة.. كفاية منظر النيل الجميل.

يا الرموش – روبي

وهو فيه أجمل من واحة سيوة؟ أغنية يا الرموش للفنانة روبي قدرت تورينا جمال منطقة سيوة من خلال طريقة تصوير مميزة، نجحت الإغنية فعلًا تسافر بينا لواحدة من أجمل الأماكن في بلدنا.

حلاوة مصرية – رولا زكي

حلاوة مصرية، أغنية عن الجمال المصري.، للمطربة رولا زكي، وهي الأغنيه الرسميه لمسابقة ملكه جمال مصر للكون 2018 Miss Egypt Universe 2018. تم تصوير الكليب في محافظتين من أجمل محافظات مصر وهم الأقصر وأسوان.

الفراعنة – أبو

أغنية الفراعنة للمطرب أبو رغم إن مناسبتها كانت مشاركة مصر في كاس العالم روسيا 2018 لكن تصوير الأغنية نفسها نجح فعلًا يخلينا نشوف صورة جميلة لمصر.. والأغنية تم تصويرها في كذا محافظة.. منهم القاهرة. يعني فيها مجهود واضح وزوايا مختلفة.

مصر قريبة – أنغام ومحمد منير

الأغنية دي عملت جدل كبير لما اتعرضت لأول مرة، وفيه ناس كتير حملتها أبعاد سياسية، لكن بعيدًا عن النقطة دي الأغنية فعلًا من أجمل الأغاني اللي تم تصويرها في القاهرة.. شوفنا فيها برج القاهرة.. ونهر النيل.. وقهاوي وسط البلد.. وحديقة الأزهر.. وغيرها من الأماكن المصرية الجميلة.