The Definitive Guide to Living in the Capital , Cairo , Egypt

مصدر الصور: المصري اليوم، واليوم السابع، والدستور، وروزاليوسف، ومواقع أخرى.

مصر فيها عدد كبير من المتاحف المهمة، وأغلبها متاحف رسمية، يعني الحكومة المصرية هي اللي مسؤولة عنها وعن تطويرها. لكن اللي كتير مايعرفوهوش هو إن بلدنا فيها عدد كبير من المتاحف الخاصة، اللي أسسها عشاق للفنون والثقافة في مصر، وعملوها بأموالهم الخاصة، والهدف منها توثيق مختلف لتاريخ مصر.

في الموضوع ده هنعرفكم على أهم المتاحف غير الحكومية الموجودة في قري ومحافظات مصر المختلفة، وبننصحك تحط المتاحف دي في قائمة أهدافك لما تزور محافظات مصر المختلفة.. أكيد هتستمتع.

 

ومن أشهر المتاحف التراثية الخاصة في مصر، “متحف حلايب والشلاتين”، اللي بيعد تحفة فنية بتجمع التراث الشعبي وتاريخ الحياه بمنطقة حلايب وشلاتين جنوب محافظة البحر الأحمر، ومؤسس المتحف هو أبوالحسن دكروني، وبيضم المتحف مقتنيات بتوثق تاريخ وتراث وعادات وتقاليد أجداده من قبائل البشارية بمنطقة حلايب وشلاتين، ومن ضمنها اللوحات الفنية اللي سجل فيها “دكروني” مختلف العادات والتقاليد للحياة البدوية.

أما متحف “بيت العبابدة” بمحمية وادي الجمال بمرسى علم في البحر الأحمر، فبيعتبر متحف بيئي بيوثق لتراث وثقافة محمية وادي الجمال، وهو متحف خاص أسسه القائمين على فندق في المنطقة، وبيضم “بيت العبابدة” كتير من المقنيات اللي بتعكس الحياة البدوية ومنها الزي التقليدي للمنطقة، والأدوات اللي بيستخدموها في احتياجاتهم اليومية زي الرحى والأواني المنزلية وحتى الدروع والخناجر التقليدية.

وفيه كمان “متحف حسن الشرق” في محافظة المنيا، واللي أسسه الفنان التشكيلي حسن الشرق، والمتحف ده بيحتوي على مئات اللوحات الفنية القيمة والنادرة.

وفيه كمان متحف مهم في أسوان اسمه “أنيماليا”، واللي بيعتبر أصغر متحف سياحي عالمي بأسوان، وبيحتوي على تماسيح ومحنطات وتعاويذ ورسومات، ومؤسسه هو “محمد صبحي عبد الشكور”.

وفي الوادي الجديد هتستمتعوا جدًا لما تزوروا “متحف تنيدة”، وهو متحف تراث واحاتي، مؤسسه هو عادل العمدة، وهو متحف فريد من نوعه بيضم عشرات من القطع والأعمال الفنية من الفخار وجريد النخيل والمشغولات البيئية والرسم على الرمال والجداريات، وكلها بيغلب عليها الطابع التراثي البدوي لأهالي الواحات.

وفيه كمان في الوادي الجديد متحف مهم اسمه “بيت مصباح الواحاتي” والمبنى نفسه دليل على روعة التراث القديم، والمتحف ده موجود في أقدم منطقة بمحافظة الوادي الجديد، وهي درب السندادية، واللي بتعكس ملامح الحياة القديمة في الواحات، والمتحف أصبح مزار سياحى ووجهة لعشاق التراث الواحاتي القديم.

أما متحف “مجموعة السمسمية” الموجود على أرض بورسعيد لصاحبه الفنان محمد غالي صانع السمسمية الأشهر في العالم، فهو مقام داخل واحد من المحلات في منطقة القنال الداخلي، وبيعتبر المتحف ده أول متحف من نوعه في مصر لآلة السمسمية، وبيحتوي المتحف على نماذج مختلفة للآلة بتوضح تطورها من 200 سنة ولحد النهارده.

وعلى أرض مصر كمان متحف خاص مميز هو “متحف السيرة الهلالية”، وده أسسه الشاعر الكبير عبدالرحمن الأبنودي في مسقط رأسه بقرية أبنود بقنا، وكان الشاعر الراحل الكبير سلمه في حياته لوزارة الثقافة بعد ما جمع فيه تراث السيرة الهلالية كاملة من خلال رحلاته في قرى ونجوع الصعيد وعدد من البلاد العربية.