The Definitive Guide to Living in the Capital , Cairo , Egypt

أول ما بنسمع إسم “فبراير” على طول بنلاقي قلوب بتطير، وورد في الشوارع، واللون الأحمر بقى في كل مكان، وطبعًا أحلى أغاني وأفلام وحفلات وذكريات مع اللي بنحبهم بتكون في الشهر ده، شهر “الفلانتاين”.

ولإننا دايمًا في كايرو 360 بنتمنى لكم السعادة والذكريات الجميلة، واللي يسعدنا إننا نكون جزء منها عن طريق مساعدتكم ومشاركتكم في إنكم تقدروا تلاقوا مكان جميل تعملوا فيه الذكريات دي، واعتمدنا في الموضوع ده على تقرير نشره موقع “مصراوي“.

علشان كده جبنا لكم حفلات شهر فبراير لأهم وألمع نجوم الغناء في الوطن العربي في مصر وخارج مصر :

• الفنان “محمد حماقي” هيقدم حفلته لعيد الحب السنة دي في “نادي الشمس” يوم الخميس الجاي ( 7 فبراير) وبكده يكون أول فنان يفتتح موسم “الفلانتاين” في مصر.

• في نفس اليوم ده، الفنانة “شيرين” هتقدم حفلة بمشاركة المطرب الكويتي “عبد الله الرويشد” على مسرح جابر الأحمد الثقافي في الكويت ضمن فعاليات مهرجان “هلا فبراير”.

• وفي نفس الليلة، هتغني النجمة اللبنانية “كارول سماحة” على مسرح دار أوبرا أوكرانيا.

• الفنانة السورية المتألقة “فايا يونان” هتطربنا بأشهر أغانيها يوم السبت ( 9 فبراير) في حفلتها على مسرح “الماركيه” في التجمع الخامس في القاهرة.

• السوبر ستار “محمد فؤاد” من المتوقع إنه يحي حفلة في فندق في القاهرة الجديدة لكن لسه مفيش أخبار أكيده عن ده.

• الفنان “مدحت صالح” هيقدم أول حفلة لدار الأوبرا المصرية بمناسبة “عيد الحب” واللي هنسمع فيها مجموعة من أغانيه، الحفلة هتكون يوم (12 فبراير) على المسرح الكبير.

• في (13 فبراير) وعلى نفس المسرح، هتقدم الفنانة “ريهام عبدالحكيم” تاني حفلات دار الأوبرا لـ “عيد الحب” .

• في ثالث يوم اللي هيوافق ( 14 فبراير) هتقدم الأوبرا ثالث حفلة ليها مع الفنان القدير “هاني شاكر ” على المسرح الكبير.

• أما الفنان “علي الحجار” بهيكون حاضر معانا في الموسم بحفلة على واحد من أعرق مسارح الإسكندرية، مسرح “سيد درويش”.

• الفنان اللي كلنا مستنيين حفلته من أول السنة، الهضبة “عمرو دياب” قرب من التعاقد على حفلة إحتمال كبير تكون في فندق من فنادق التجمع الخامس، وغالبًا هتكون يوم (14 فبراير) ده غير حفلته يوم (22 فبراير) اللي هتكون في جامعة مصر للعلوم والتكنولوجيا.

• الفنان “إيهاب توفيق” هيسافر أمريكا علشان يقدم حفلة في ولاية “ناتشفيل” يوم (14 فبراير) مع مجموعة من الفنانين منهم المطرب الشعبي “طارق الشيخ” و “أيمن أبوالليف” والفنان الكوميدي “أيمن منصور”.

• وعلى مسرح المنارة في التجمع الخامس، فريق “شارموفرز” هيقدم حفلة جديدة هيكون معاهم فيها الـ DJ العالمي “أفروجاك” لأول مرة في مصر، وده هيكون يوم الجمعة (15 فبراير).

• الكينج “محمد منير” إختار الإمارات علشان يكون فيها أول لقاء ليه بجمهوره وعشاق فنه بعد ألبومه الأخير “وطن” وهيقدم حفلة في قرية دبي العالمية يوم (15 فبراير).

• المطربة اللبنانية “هبة طوجي” والموسيقار “أسامة الرحباني” هيتقدموا مع بعض تاني حفلاتهم في مصر، وهتغني “طوجي” على مسرح “الماركيه” في التجمع الخامس مع أوركسترا سفنكس السيمفوني، بقيادة د. هاني حسن.

وزي ما وعدناكم دايمًا، أجندة كايرو 360 في أي وقت وفي أي يوم هتلاقيها دايمًا بتقولك على أجمل وأجدد الحفلات والإيفنتات في القاهرة بطولها وعرضها، هابي فالنتين داي.