The Definitive Guide to Living in the Capital , Cairo , Egypt

سحر المغنى في قلبه جمعنا روح بتغني لروح، نور مشاعرنا لحن واخدنا وإحنا معاه بنروح لحد قلعة صلاح الدين الأيوبي من يوم الخميس 2 أغسطس اللي جاي لحد الجمعة 17 أغسطس، كل يوم من الساعة 8 بالليل لحد 10 هتستمتعوا بأجمل الفرق والفنانين يوميًا بمعدل حفلتين كل يوم.

سعر تذكرة الدخول للقلعة وحضور الحفلتين 15 جنيه، والحفلات بتكون تحت رعاية دار الأوبرا المصرية، وفي الوقت ده القلعة بتبقى شكلها مختلف جدًا وبتتجمل بالكامل وبتخطف القلب قبل النظر.

وإحنا في كايرو 360 هنقول لكم على برنامج الحفلات اليومي علشان تقدروا تختاروا اليوم اللي حابين تروحوا فيه، وإحنا بننصحكم تروحوا كل يوم، علشان تستمتعوا بألوان مختلفة من الفن الأصيل. شوفوا الجدول من هنا:

حفلات.. حفلات

الحفلات هتبدأ يوم الخميس 2 أغسطس بفرقة الشباب والأطفال الصينية الساعة 8 مساءً، ويليها الساعة 10 مساءًا الفنان هاني شاكر بمصاحبة فرقة الموسيقى العربية بقيادة المايسترو إبراهيم الموجي، وفي 3 أغسطس فريق فؤاد ومنيب 8 مساءً والفنانة غالية بنعلي 10 مساءً، و4 أغسطس الفنانة نسمة عبد العزيز 8 مساءً، الفنان علي الحجار الساعة 10 مساءً.

ويوم 5 أغسطس هتبدأ الحفلة الأولى مع أناشيد الشيخ ياسين التهامي، ويليه الفنان مجد القاسم، و6 أغسطس هنستمتع بفرقة سواريه ومن بعدها الفنان محمد رشاد بمصاحبة الفرقة الموسيقية بقيادة الدكتور علاء ياسين، ويوم 7 أغسطس مجموعة الحضرة للإنشاد الصوفي، ومن بعدها الفنانة نسمة محجوب.

وهيطل فريق مونت كايرو ومعاه فريق النفيخة 8 مساءً يوم 8 أغسطس وبعدهم الفنان محمد محسن في حفلة 10 مساءً، وفي 9 أغسطس الفنانة دلال أبو آمنه وفرقتها “ياستي” الفلسطينية بقيادة الدكتور تيسير حداد 8 مساء، ومن بعدهم الفنان أحمد جمال 10 مساءً، ويوم 10 هنستمتع بفرقة عمدان نور مع الفنان محمد محسن وفرقته 8 مساء، والفنانة نادية مصطفى الساعة 10 مساءً.

ومن المكسيك هتيجي فرقة إيكال إنسامبل يوم 11 أغسطس وبعدها حفلة الفنان إيمان البحر درويش، وفي يوم 12 أغسطس، فرقة بنما للفلكلور وفرقة بغدادي باند، وبعدها الفنان محمد الحلو وفرقته، ويوم 13 أغسطس فرقة أوركسترا الصين للموسيقى التقليدية مع ويف جاز باند، ومن بعدهم الفنان لؤي بصحبة فرقته الموسيقية.

أما في يوم 14 أغسطس هتيجي أوركسترا فرقة النور والأمل بقيادة محمد سعد باشا، ومن بعدهم الفنان خالد سليم، وخلال يوم 15 أغسطس الفنان فتحي سلامة مع الشيخ محمود التهامي، وبعدهم الفنان هشام عباس، وفي يوم 16 أغسطس الفنانة نيفين رجب وفرقة محمد وهيدي، وبعدها الفنان إيهاب توفيق وفرقته.

وفي ختام المهرجان هنستمتع على مسرح القلعة الساعة 8 مساءً بفرقة العريش للفنون الشعبية وبعدهم الساعة 10 مساءً الفنان مدحت صالح وفرقة الفنان عمرو سليم.