The Definitive Guide to Living in the Capital , Cairo , Egypt

بما إن الويك إند هيبدأ النهارده، يبقى لازم نستعد للإستمتاع ونرجع منه مغسولين من جوانا، وعلشان كده أجندتنا في كايرو 360 بتكون مليانة، وفي الكلمتين الجايين هنرشح لكم أهم الأحداث اللي ممكن تعجبكم، بس ماتسوش إن في أحداث أكتر، وفعاليات أكتر، هتلاقوها في أجندتنا دايمًا:

هنبدأ بيوم الخميس.. وسهرة موسيقى عربية هنسمع فيها أغاني الزمن الجميل للفنانات نجاة وشادية ووردة هيقدمها فريق كورال مركز إبداع في قصر الأمير طاز الساعة 7 بالليل. الدخول مجانًا.

حفلة دعسوقة الجديدة هتكون في رووم فرع جاردن سيتي الساعة 9، هتسمعوا فيها ميكس موسيقى جديد ومختلف. سعر التذكرة: 100 جنيه.

وممكن كمان بـ 35 جنيه تحضروا حفلة إنشاد ديني للشيخ أحمد التوني في مركز الربع الثقافي، هيقدم فيها مجموعة من الأناشيد الصوفية والمديح. الحفلة هتبدأ الساعة 7.

يوم الجمعة.. بما إنه يوم بنحس فيه بالحرية، فتقدروا تبدؤه بـ”لفة عجلة“، وفطار مع فريق “يالا بينا” في مصر الجديدة. إيجار العجلة بـ 60 و80 جنيه حسب النوع. الرايد هيبدأ من 7:30 الصبح.

وكمان لإن الجمعة يوم روحاني، فبنرشح لكم الساعة 7 بالليل حفلة الاحتفال بالهجرة النبوية لفرقة أبو شعرة الصوفية بأغانيها الدينية المميزة في ساقية الصاوي. سعر التذكرة: 57 جنيه.

وممكن كمان تسهروا في درب 1718 مع باند “كارافان ساراي” ومزيج موسيقى شرقية هندية فريدة من نوعها. التذكرة سعرها 107 جنيه.

 يوم السبت.. آخر يوم في الويك إند، هيبقى في عرضين في اليوم للإستعراض العالمي “أليس في بلاد العجائب” في دار الأوبرا المصرية. أسعار التذاكر بتبدأ من 110 جنيه. بنرشح العرض جدًا للكبار والأطفال.

كمان بنرشح سهرة مع فريق “الدور الأول” اللي هيكون موجود في “درب 1718” الساعة 8. التذاكر سعرها 107 جنيه.

وعلشان الختام يبقى بأحلى إيفينت، بنفكركم بحفلة “أسياد الزار” الساعة 9 واللي هتكون في مركز المصطبة في وسط البلد. سعر التذكرة: 50 جنيه.

ماتنسوش تتابعوا أهم وأحدث الفعاليات في القاهرة من أجندة كايرو 360 اللي هتلاقوا فيها أحداث أكتر من هنا. 

وويك إند سعيد عليكم يارب.