The Definitive Guide to Living in the Capital , Cairo , Egypt

بالرغم من أن المهتمين بالحركة الفنية التشكيلية في القاهرة يعتبروا قلة مش أغلبية؛ إلا أن لو تعداد سكان القاهرة 9 102 232 نسمة -حسب الكتاب الإحصائي السنوي للجهاز المركزي للتعبئة العامة والإحصاء لعام 2014- وحصل أن ربع العدد ده مهتم، هـ يفضل العدد كبير حتى وإن كانوا مش الأغلبية، ما علينا من الحسابات المعقدة، المهم أن فيه عدد غاوي فن، والمقال ده معمول علشانهم مخصوص.

 

جاليري سفر خان:

بافتتاحه في الثمانينات، سفر خان يعتبر من أوائل القاعات الفنية في مصر، بمعارض لفنانين زي حامد ندا، عبد الهادي الجزار وصلاح عبد الكريم، سفر خان متخصص في عرض أعمال عباقرة الفن التشكيلي المصري، بالرغم من أن مساحته محدودة، إلا أن القائمين عليه بـ يهتموا بطريقة عرض الأعمال باختلاف أنواعها، جاليري سفر خان له فرع ثاني في الجونة، وبعكس فرع الزمالك، القاعة هناك كبيرة وتستوعب عدد كبير من الأعمال باختلاف أحجامها.

ما تتوقعش أنك تلاقي فيه أعمال شبابية معاصرة، ولكن ده ما يمنعش أنك هـ تشوف هناك أعمال فنانين كبار مش هـ يتكرر وجودهم ثاني، دي صفحة الجاليري على الفيسبوك لو عاوز تزور معارضهم.

 

قاعة الزمالك للفن:

من القاعات المفضلة بالنسبة لنا لأنها مكونة من قاعتين مش قاعة واحدة، وبالتالي كل شهر تقريبًا بـ يستضيفوا معرضين لفنانين مختلفين، إلا لو معرض جماعي، وبالتالي بــ تبقى القاعتين محجوزين علشان تستوعب عدد كبير من الأعمال. قاعتين الجاليري بـ يتميزوا بمساحتهم الكبيرة المنقسمة لحجرات مختلفة واسعة تسمح لك أنك تقف على مسافة كافية من الأعمال وتتفرج عليها براحتك، زائد طول الحوائط اللي بـ يستوعب الأعمال الضخمة.

قاعة الزمالك للفن مشهورة بـ تقديرها للأعمال النحتية، وخصوصًا الجيد منها زي معرض الفنان كمال الفقي بعنوان "المنظومة"، وبعكس جاليري سفر خان، قاعة الزمالك للفن بـ تقدم كل فترة أعمال لفنانين شباب لو أعمالهم على قدر المستوى.

قاعة الزمالك للفن مواعيدها مضبوطة، وصفحتهم على الفيسبوك في نشاط دائم.

 

مدرار:

بـ يختلف مدرار عن الجاليريهات الثانية بأنه بـ يشجع الأعمال المعاصرة والحداثية سواء من حيث الفكر أو الخامة، وخصوصًا اللي بـ يقدمها الشباب. وبالتالي الفكرة النمطية عن الجاليريهات الباردة واللي بـ تسمع فيها دبة الإبرة على الأرض مش موجودة في مدرار، لأنه مش بس جاليري، ده كمان مساحة فنية بـ يقام فيها ورش فنية نتاجها بـ يعرض للجمهور، زي ورشة الفنان هاني راشد للتصوير والكولاج واللي خرجت مجموعة من أعمال فنانين شباب تحت إشرافه.

تابع مدرار على الفيسبوك علشان تعرف نشاطاتهم المختلفة.

 

جاليري مصر:

جاليري مصر قدر يوصل لجمهور الفن التشكيلي في القاهرة بسرعة بالرغم من أنه يعتبر حديث نوعًا ما (افتتح سنة 2011). الجاليري متخصص في تقديم الأعمال المعاصرة والحديثة أيًا كانت خامتها، من أول اللوحات الفنية حتى الفيديو. وبما أن القائمين على الجاليري مجموعة من الفنانين، فاختيارات المعارض بـ تكون مبنية على جودة الأعمال بغض النظر عن تاريخ واسم الفنان. فعلى سبيل المثال من حوالي شهرين عرض جاليري مصر مجموعة من أعمال الفنان فتحي عفيفي، وهو فنان بدأ من الصفر بعمله في أحدى المصانع الحربية، بعدها درس الفن علشان بعد كده يحترفه من غير ما يفقد موهبته الخام.

جاليري مصر أعماله بـ تتميز بأنها وسط ما بين دوشة وجنون الجاليريهات اللي بـ تقدم الفنانين الشباب، والجاليريهات اللي بـ تعتمد على الفنانين المخضرمين، بعكس جاليريهات كثيرة معارضها ما بـ تدومش كثير، جاليري مصر معارضه عادة بـ تستمر لمدة شهر، وأحيانًا أكثر، تابعهم على الفيسبوك.

 

ملحق غروب على النيل:

لو عاوز تتعرف على آخر حاجة وصلت لها الحركة الفنية الحديثة في مصر، وتشوف أعمال مجنونة لفنانين شباب معروفين بتميزهم، روح ملحق غروب على النيل. فنانين متميزين زي كريم لطفي، أنديل ودينا دانش وغيرهم بـ يقدموا تجارب مختلفة هناك. عيب المكان الوحيد أن المعارض مش متاحة في كل الأوقات، يعني مثلًا ممكن تلاقي المعرض متاح للزوار من 12: 4 مساءً كل يوم سبت، أو تأخذ موعد مسبق… هو صحيح وجع دماغ لأي حد زينا بـ يحب يزور المعارض الفنية بشكل عفوي ومن غير ترتيب، إلا أن المكان يستحق الزيارة. غير كل ده، ملحق غروب على النيل يعتبر مكان ثقافي بـ يستضيف فعاليات كثير، مش معارض بس، لو عايز تتعرف على المكان شوف هنا.

لو أنت مش من الناس اللي بـ تبلع التجارب الفنية المجنونة، ننصحك ما توجعش دماغك وتروح.

 

جاليري مشربية:

بعكس جاليريهات كثيرة مالهاش في أي حاجة غير المعارض اللي بـ تقدمها؛ جاليري مشربية مهتم بكل ما له علاقة بالفن سواء أعمال فنية، حفلات توقيع كتب بـ يلعب فيها الفن التشكيلي والفوتوغرافي دور أساسي، أو حتى عرض أفلام لها علاقة بالعمارة والفن بشكل عام، ده غير أن في يوم الأحد من كل أسبوع بـ يقام ندوة مفتوحة بـ يشارك فيها فنانين من كل المجالات. وأحلى حاجة أنهم بـ ينشروا على صفحتهم على الفيسبوك أهم الأحداث الفنية الموجودة في القاهرة حتى لو مش هـ تقام في مقر الجاليري… هي دي الروح!

 

آرت لاونج كايرو:

آرت لاونج كايرو بـ يتميز باختياراته المتميزة، وإدارته المهتمة بالفن بشكل عام، شخصيًا أكثر حاجة بـ تعجبنا في معارض الفنانين هناك أنها بـ تبقى مختلفة سواء من حيث المضمون والتنفيذ من غير بهرجة "إحنا مختلفين علشان إحنا جامدين وعباقرة". آرت لاونج كمان بـ يقدم حلقة نقاشية مفتوحة للجمهور بـ تتيح للفنانين أنهم يتواصلوا مع الجمهور بشكل مباشر بعيد عن فلسفة الكتيبات الغامضة.

آرت لاونج بـ يوفر ورش عمل ممكن تستفيد منها لو نفسك تمارس الفن بنفسك، اعرف أكثر عنها هنا.

 

قاعة بيكاسو للفنون:

قاعة بيكاسو للفنون ممكن نعتبرها من قاعات الـ Old School -أو المدرسة القديمة- ولكن مش لدرجة المعارض المتحفية. فبالرغم من أن إدارة المكان متمسكة بسياسة "إحنا ما بـ نعرضش لأي حد" إلا أن قائمة الفنانين اللي بـ يقدموا معارض عندهم تعتبر ذهبية. أولًا لأنهم بـ يختاروا الفنانين المخضرمين زي جورج البهجوري، نازلي مدكور، عمر النجدي والعبقري حلمي التوني. فحتى لو أنت لك بس في أعمال شباب الفنانين، أكيد مش هـ تقدر أن يبقى فيه معرض لعملاق من العمالقة الكبار دول، وما تروحش.

برضه، لو ما لكش في الكبار، شوف هنا آخر معارضهم وروح لأنك مش هـ تندم.

 

آرتس مارت:

شوف بقى، كل اللي إحنا اتكلمنا عليهم دول كوم، وآرتس مارت ده لوحده كوم ثاني؛ لأنه بدأ لمدة مش قليلة بعرض وبيع اللوحات الفنية لأي فنان من أي مدرسة وسن عن طريق موقعهم على الإنترنت. ولكن بما أن أي حاجة على الطبيعة أحلى –وبالذات الأعمال الفنية-  قرروا أنهم يفتحوا مكان لعرض أعمال الفنانين على الطبيعة. هو صحيح المكان بعيد عن المدينة –بجانب داندي مول في أكتوبر- إلا أن مساحته بـ تستوعب عدد لا نهائي من الأعمال على كل نوع وحجم، ده غير أن فيه مساحة فنية بـ تقدم ورش عمل فنية بـ تتعلم فيه على أيادي أكبر الفنانين في مصر، زي  الفنان الكبير طاهر عبد العظيم، شوف المواعيد اللي تناسبك هنا.

 

الكحيلة:

الكحيلة من الجاليريهات النادرة الموجودة في المهندسين؛ تحس أن المعارض مقسمة ما بين جاردن سيتي، زمالك ووسط البلد وكأن أهل بقية المناطق مالهمش نفس. المهم، الكحيلة ما يختلفش عن أي مكان ثاني من الجاليريهات الثانية اللي ذكرناها، ولكن اللي دخله وسط المجموعة دي سببين: أولًا، عناية القائمين على المكان باختيار اللوحات المعروضة والفنانين اللي بـ يعرضوا عندهم. ثانيًا، ودي حاجة نادرًا ما تلاقيها موجودة في أي مكان ثاني، أنهم مش بـ يتعاملوا على أن أسعار اللوحات سر من أسرار الدولة اللي لا يمكن يقولوه… تخيل أن أسعار اللوحات معروضة على صفحتهم على الفيسبوك؟!  

 

في النهاية الفن أذواق، إحنا مش بـ نقول هنا مين أحسن من مين، لأن في النهاية اللي بـ يحب يروح جاليريهات كثير بـ يبقى عارف مكان أو اثنين بـ يفضلهم لأنهم بـ يقدموا اتجاهه المفضل، بس لو حابب تغير، يبقى يا رب نكون نفعناك.