دليل كايرو360 للمكتبات والأماكن الثقافية في وسط البلد
Rehab Loay
مملة، ومتابعة الكتب الجديدة وأخبار الكتب مش حاجة مقصورة على المثقفين لأن مافيش
حاجة اسمها مثقفين ومش مثقفين، كلنا مثقفين بصورة أو بأخرى، كل واحد على طريقته
الخاصة، وإذا كنت عاوز تلاقي متعة في اكتشاف نفسك واكتشاف العالم من حولك ابدأ اقرأ،
ومش أي كتاب ييجي في إيدك تقرأه، ضروري يكون مهم وفارق، وإلا هـ تكره القراءة
والكتب وكل ما له علاقة بالورق والكتابة، وساعتها مش هـ يبقى ذنبك، لكن ذنب الحاجة
السيئة اللي قرأتها.
تقدر تتجنب كل الكلام
ده لو أنت متابع وعارف مين بـ يكتب، ومين بـ يقول إيه، وده تعرفه ببساطة لو بـ تتردد
على مكتبات ومراكز ثقافية بصورة متوازنة، في أجازتك أو في أوقات فراغك، وفي السطور
القادمة هـ نقولك على المكتبات والمراكز الثقافية اللي في منطقة وسط البلد اللي
تقدر تروحها وتعرف إيه الجديد في عالم الكتب، وكمان تقابل الكتاب وتتكلم معاهم
وتناقشهم في اللي قرأته.
1- دار ميريت
دي بقى دار نشر،
مكانها في 6ب شارع قصر النيل، أمام الخطوط الجوية العربية السعودية، في وسط البلد،
تليفوناتها: 0142138925-0104334979-0225797710
بصراحة دور النشر المهمة
في مصر قليلة، وده له أسباب كثيرة مش وقته أننا نقولها دلوقت، لكن اللي بـ نتكلم
عنه أن فيه دار نشر اسمها ميريت تعتبر ثاني أهم دار نشر في مصر بعد دار الشروق
العملاقة، رغم الفارق الكبير بين الاثنين من حيث الإمكانيات، وحتى المكان، والمقر،
ورأس المال، وخلافه.
الأكيد أن الدار دي
مش بـ تنشر أعمال أي كلام، ومعظم الأعمال المنشورة عندها بـ تأخذ جوائز، وبـ يعاد
نشرها مع دور نشر كبيرة زي رواية “بروكلين هايتس” اللي فازت أخيرًا بجائزة
نجيب محفوظ عن الجامعة الأمريكية. ومش بـ تكتفي فقط أنها تنشر الأعمال الكويسة لا
وكمان بـ تعمل ندوات دورية لأعمال صدرت من عندها أو من دور نشر ثانية، وبـ تستضيف
في الندوات دي ناس مهمين جدًا، ومن الندوات الأخيرة اللي استضافتها كانت ندوة سمير
عيطة رئيس تحرير الطبعة العربي من اللوموند ديبلوماتيك علشان يتكلم مع الحضور عن
الأوضاع في سوريا باعتباره سوري.
لو كنت شاب وعندك
كتاب شايف أنه يستاهل النشر، أو حابب تختلط بالوسط الثقافي وتقرب من الكتاب
والأدباء ما تترددش في أنك تروح ميريت، حتى لو مش في أوقات الندوات، لو رحت في أي
وقت هـ تلاقي لك مكان تقعد وتتناقش وتتفرج على الكتب وتتعرف على صاحب الدار
الأستاذ محمد هاشم، كمان تقدر تعرف مواعيد الندوات ومين هـ يحضرها من موقع زي
اليوم السابع اللي بـ يكتب أول بأول في قسم الثقافة مواعيد الندوات اللي بـ تقام
في كل الأماكن الثقافية ومن بينها دار ميريت.
2- أتيليه القاهرة
أما ده بقى فهو ملتقى
للفنانين والأدباء موجود في 2 شارع كريم الدولة (متفرع من شارع محمود بسيوني)-
ميدان طلعت حرب، في وسط البلد، رقم
التليفون:0225746730
سنة 1953 تم إنشاء
أتيليه القاهرة على أنه جمعية أهلية تحت مسمي “جماعة المثقفين والكتاب – أتيليه
القاهرة”، باعتبارهم جماعة فرانكفونية بـ تضم مصريين وأجانب من فنانين وكتاب،
وبعض محبي الفنون الجميلة، وكانت استمارة العضوية باللغة الفرنسية فقط، زي ما كانت
اللغة الأم اللي بـ يتكلم بها أعضاء الأتيلية، وكان من أوائل المؤسسين الفنان محمد
ناجي، وراغب عياد، وجبرائيل بقطر، وصدقي الجباخنجي، والمستشار الثقافي الإيطالي
ماريا بالمار، اللي تولت منصب نائب رئيس الأتيليه، ومدير المعهد البريطاني ديفيد
هاول.
الأتيليه ده أصلاً
كان ملك سيدة يهودية من أصل فرنسي اسمها ليندا كوهينكا، لكن أجروا منها المكان
بقيمة إيجار 50 جنيه وقتها. دلوقتي المكان ده بـ يتكلموا فيه عربي عادي، ورئيس
مجلس إدارته الفنان المشهور محمد عبلة، وبـ يتعمل فيه ندوات ومعارض بصفة مستمرة،
لو عاوز تعرف جدولهم تقدر تتابع الجرائد أو تروح تزوره وتعرف الجدول اللي غالبًا بـ
يكون مُعلق في المدخل.
المكان هناك فيه روح
مختلفة، لما هـ تقعد هـ تحسها، روح موجودة فقط في البيوت القديمة، والناس هناك
لطيفة وذوق، وكمان الكافيتريا هناك التعامل معاها مريح جدًا.
فيه مشكلة واحدة أنك
لازم تكون عضو علشان تقدر تدخل، لكن في المواعيد اللي بـ يكون فيها ندوات تقدر
تدخل عادي وتسأل عن العضوية ممكن تكون إزاي وتستمتع بالمكان والصحبة.
كان من آخر الفعاليات
اللي اتعملت في الأتيليه معرض كاريكاتير للفنان السوري علي فرزات، اللي الأمن
السوري كسر له أصابعه علشان ما يرسمش كاريكاتير ضد السلطة ثاني، وكان المعرض ده
فيه لوحات له، ولفنانين مصريين رسموا عن الثورة السورية وعن حادث علي فرزات، كنوع
من التحية والاحترام له.
3- مكتبة مدبولي
6ميدان طلعت حرب، وسط
البلد، القاهرة، رقم التليفون: 25756421
المكتبة دي تاريخ أكثر
منها مجرد مكان تشتري منه كتب أو تفوت عليه علشان تشوف آخر العناوين، ولا هي مجرد
مكان بـ ينشر كتب مهمة ومضمونها قوي، ولا هي برضه مجرد مكتبة بـ تقدم أسماء لكتاب
بـ نكتشف بعد كده قد إيه هم مهمين.. المكتبة دي جزء من التاريخ.
صاحبها الحاج مدبولي
الله يرحمه، الرجل اللي ما كانش متعلم، ساهم في نشر أهم وأكبر كتب، شاهد على العصر
ورجل محترم وقصة حياته حكاية كبيرة لما تقرأها تعرف منها قيمة الحياة، ولما تحب
تشوف نتيجة الكفاح روح العنوان ده اتفرج على المكان واعرف أن مهما كانت إمكاناتك
ووضعك ففي النهاية تقدر تكون حاجة كبيرة وتعمل حاجة أكبر.
بـ تهتم مكتبة مدبولي
بالكتب اللي لها علاقة بالإسلام السياسي، والجماعات الإسلامية، والسياسة،
والمعاجم، لو عاوز تأسس نفسك ثقافيًا صح روح هناك وابدأ اقرأ وهـ تتبسط من النتيجة.
4- مكتبة الشروق
القاهرة (وسط البلد):
1 ميدان طلعت حرب – تليفون: 0223912480 – 0223930643
القاهرة (مصر الجديدة):
15 شارع بغداد – الكوربة – تليفون: 0224171945 – 0224171944
القاهرة (مدينة نصر):
سيتى ستارز مول – الدور الأول – مدخل 7 – تليفون: 0224802544
القاهرة (الزمالك):
17 شارع حسن صبري
القاهرة (المطار):
صالة سفر 2،1 و صالة وصول 2،1
الجيزة: فرست مول – 35
شارع الجيزة – تليفون: 0235735035 – 0235685187
الجيزة (المهندسين):
26 شارع محمد كامل مرسى- تليفون: 0233361707- 0233361774
طريق القاهرة
الإسكندرية الصحراوى: واحة عمر – تليفون: 0101633711
الإسكندرية: سان
ستيفانو مول – تليفون: 034690370 – 0101633685
مكتبات الشروق بقى
حكاية كبيرة، الوجه المعروف فيها هو إبراهيم المعلم، وهو نفسه رئيس مجلس إدارة
جريدة الشروق، وكمان صاحب جريدة التحرير، الرجل ده مهم جدًا، والدار دي تعتبر أكبر
دار نشر في مصر، ويمكن في الشرق الأوسط كمان، ضخمة جدًا، وغير مكتفية بطباعة الكتب
فقط، لأ كمان داخلة في طباعة الصحف، وفي سلاسل المكتبات، من أنجح التجارب اللي تحب
تقرأ عنها وتتابعها أول بأول.
في فرع مكتبتهم اللي
في وسط البلد في ميدان طلعت حرب تقدر تشوف أحدث العناوين لأهم الكتاب اللي
تتخيلهم، واللي تحبهم، وفيه كُتاب مش بـ يطبعوا أعمالهم غير في الشروق، ومش ممكن
تلاقي أعمالهم الحديثة غير مع الشروق، زي بلال فضل، وجمال الغيطاني، ومحمد حسنين
هيكل، وكل الكتاب الكبار اللي مش بـ يرتاحوا غير مع الدار دي.
يمكن الفرع الوحيد
اللي مش بـ يتعمل فيه ندوات للكتب هو الفرع ده، أما باقي الفروع خاصة الفرعين اللي
في المهندسين والزمالك فـ بيتعمل فيهم ندوات كثيرة جدًا، تقدر تعرف مواعيدها من
جريدة الشروق أول بأول.
5- التاون هاوس
10 شارع النبراوي متفرع من
شارع شمبليون – وسط البلد، عبارة عن جاليري، وهو قاعة مفتوحة لأي
عمل فني، وغالبًا هـ تلاقي الأعمال الموجودة فيه لأجانب بـ يزوروا مصر، وفي المكان
ده فيه تخطيط، من سنة 1997 هدفه زي ما بـ يقول القائمين عليه التنمية الثقافية
والثاني هو رعاية الفن المعاصر، ولما تروح هناك هـ تلاقي إعلانات عن كل الفعاليات
الثقافية.
6- مسرح روابط
أما بقى مسرح روابط
فهو جنب التاون هاوس على طول، في شارع حسين المعماري متفرع من شارع معروف المتفرع
بدوره من شارع شامبليون (انزل شامبيليون واسأل فين معروف، ادخل أول معروف من
شامبليون وادخل أول شارع يمين بعد جراج معروف).
على المسرح ده هـ تشوف
حفلات ومسرحيات وأمسيات للشباب المصري الموهوب بجد، ولو عاوز تتعرف على الحركة
الشبابية الفنية الجديدة روح هناك وتابع فعالياته أول بأول من خلال الإعلانات داخله،
أو في الجرائد وخاصة الشروق واليوم السابع.
7- دار نشر أرابيسك،
ووعد
الدار دي في وسط
البلد، قريبة جدًا من كشري أبو طارق، بـ تشجع الشباب، ولو حبيت تشوف كتابات قوية
لشباب صغيرين في السن، وناس كبار كمان، روح المكتبة دي. صاحبها هو طاهر البربري
مترجم مشهور، ومثقف مهتم بالثقافة.
والكلام ده برضه بـ
ينطبق على دار وعد للنشر اللي موجود في شارع شامبليون، وبرضه بـ تشجع الشباب وبـ تراعيهم،
وبـ تنظم ندوات كثير مهمة.
8- مكتبة أبجدية
المكتبة دي بقى جديدة
تمامًا، آخر حاجة ثقافية افتتحت في وسط البلد، مكانها شارع طلعت حرب، عمارة 12 شقة
رقم واحد.
المكتبة دي اتعملت علشان
خاطر الناس تروح تقرأ وتفهم، مش بس علشان التوعية الثقافية، لأ وكمان علشان
التوعية السياسية، فيه ورش أطفال، ومحاولة للتواصل مع الناس، وحفلات توقيع كتب،
وبـ يرعي الفعاليات هناك زي الأديبة صحى العاصي، والكاتب أحمد الصوان، وهند مختار،
وغيرهم كثير.
هناك كتب للاطلاع،
وكتب للبيع، وورش للأفلام الروائية وغيرها، هدفها تعلمك من خلال ورش وتطلع منتج
وتسوقه، ورش صحافة وسينما ودعاية وإعلان وتصميم، ده غير ورش ثانية.
9- مكتبة البلد
31 شارع محمد محمود أمام
الجامعة الأمريكية، في الدور الثاني، فوق سيلانترو.
المكتبة دي مش مجرد
مكان لشراء الكتب، هي كمان مقر للندوات وحفلات توقيع الكتب الجديدة اللي بـ يقدمها
الشباب، غالبًا هـ تلاقي هناك كل أسبوع تقريبًا كتاب جديد بـ يتم توقيعه، ده غير أن
فيه مكان علشان تقعد فيه، ومكان ثاني علشان لو عندك معرض لوحات فنية تقدر تعرضها
هناك.. من الآخر هـ تبقى مبسوط وأنت قاعد وسط الكتب بـ تشرب حاجة وبـ تتفرج على
اللوحات، وأسعار المشروبات هناك مش أغلى من سيلانترو ومش أقل كثير… وسط يعني.
10- مكتبة عمر بوك
ستورز
عمر بوك ستورز – 15 ش
طلعت حرب – أعلى مطعم فلفلة – 0103361217.
في سياق الكلام عن
قصص النجاح خلونا نحكي عن مكتبة عمر بوك ستورز، وزي ما هو واضح صاحبها اسمه عمر،
والمكتبة دي رغم أن مكانها مش واضح شوية، لكنها ناجحة جدًا، والناس بـ تيجي لها لأنهم
عارفين صاحبها، ولأنها مش المكان الوحيد اللي عمر بـ يبيع فيه الكتب.
عمر محامي، ترك
المحاماة واهتم بفرشة الكتب اللي سابها له أبوه، واللي تقدر تشوفها على يمينك وأنت
داخل أول شارع طلعت حرب، ومن الفرشة دي، حوش وقدر يفتح المكتبة اللي بقت امتداد
للفرشة، ومع ذلك ما سابهاش وفضل مكمل في المكانين.
صعب تلاقي بياع كتب
مثقف، يرشح لك الكتب اللي تقرأها، وبـ يناقشك ويقول لك الفرق بين الكتب والأسعار،
وكمان تقدر تفاصل معاه.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
