The Definitive Guide to Living in the Capital , Cairo , Egypt

مجلة “تايم” الأمريكية  وقع اختيارها على الفنانة المصرية “دينا الوديدي” علشان تكون واحدة من ضمن قائمة بتضم شباب من جميع أنحاء العالم، يتوقع ليهم إنهم يبقوا قادة المستقبل (الجيل القادم).

المجلة اتكلمت كمان عن أكتر ألبومات دينا تأثيرًا، واللي حقق لها شهرة محلية كبيرة، واللي بعنوان “تدور وترجع” واللي طلع سنة 2014، وقالت عنه إنه “رحلة في تاريخ مصر” وده لإنه بيضم موسيقى من الفولكلور والشعر العربي، وساهمت “دينا” من خلاله في تعريف الجمهور بتراث مايعرفهوش ناس كتير.

دينا تعاونت خلال مسيرتها الفنية مع فرقة “مشروع النيل” فى مشروع فني جديد بيربط الفنانين الأفارقة والجمهور الأوروبي والأمريكي، علشان التوعية بمشاكل المياه في إفريقيا، وأهمية المحافظة عليها، كجزء من إيمانها بدور الفنانين الاجتماعي والتوعوي.

آخر ألبومات “دينا” واللي شاف النور السنة اللي فاتت وكان بعنوان “منام” تضمن دعوة واضحة للمستمعين لركوب القطارات المصرية، وقالت إنها كانت بتنام كتيرً في القطارات وهي مسافرة، واكتشفت مع الوقت إن صوت الهوا اللي بيدخل من الشبابيك المكسورة، مع صوت الكراسي المكسرة في القطارات، بيعملوا “ميكس” و تناغم وإيقاع موسيقي “فريد”، ويمكن ده السبب في إن المجلة وصفت دينا  بـ”صوت الأمل” في مصر

بدأت دينا مشوارها بغناء الأغاني الفلكلورية على المسرح المصري، بعد كده عملت فرقة خاصة ليها سنة 2011 وقدمت مع الفرقة بعد كده أغاني كتير بين جاز، وروك، وإلكتروني، كمان شاركت في 2013 في جولة موسيقية مع الأيقونة البرازيلية “جيلبرتو جيل”

أحدث حفلة لـ “دينا ” هتبقى يوم الثلاثاء 21/5/2019 في ضمن السهرات الرمضانية اللي بتقدمها دار الأوبرا المصرية على المسرح المكشوف.