The Definitive Guide to Living in the Capital , Cairo , Egypt

متاحف القاهرة أصبحت حية وبتقدم معارض وأنشطة جميلة قادرة تجذب الناس، ده اللي هتتأكدوا منه لو روحتوا متحف الفن الإسلامي بالقاهرة اليومين دول، واللي بيستضيف حاليًا معرض “رحلة النقود في مصر عبر العصور” وهيستمر لحد يوم 3 أكتوبر الجاي.

وبتشارك في المعرض مصلحة الخزانة العامة وسك العملة التابعة لوزارة المالية المصرية، واللي وفرت للمعرض عدد كبير من العملات اللي بتحكي قصة النقود خلال رحلة صناعتها في مصر من آلاف السنين.

ومتحف الفن الإسلامي بالقاهرة بيعتبر من أهم المتاحف المتخصصة على مستوى العالم، وبيحتوي على أكثر من ١٠٠ ألف قطعة أثرية للعصور الإسلامية المختلفة من عهد الخلفاء الراشدين وحتى أسرة محمد على والدولة الحديثة.

ومعرض “رحلة النقود في مصر عبر العصور” تم التجهيز له بالتعاون بين مصلحة الخزانة وسك العملة المصرية، ومركز دراسات الخطوط بقطاع البحث الأكاديمي بمكتبة الإسكندرية، وهو بيحكي تاريخ العملة المصرية اللي بيمتد لأكثر من ٢٥٠٠ سنة.

وبيعتبر المعرض سجل مصور لفنون الخط والكتابة ومراحل تطور سك العملات، من وقت سك أول عملة في مصر ولحد العصر الحديث، وبيتضمن المعرض: «النقود البلطمية، والسكندرية، والرومانية المتأخرة والبيزنطية، والأموية، والعباسية، والطولونية، والإخشيدية، والفاطمية، والأيوبية، والمملوكية، والعثمانية، والعلوية، إضافة إلى النقود الجمهورية، اللي تم سكها بمصلحة سك العملة المصرية بداية من عام ١٩٥٤.

وبيحتوي المعرض كمان على مجموعات مميزة من العملات والميداليات التذكارية، ومنها: أول ميدالية تذكارية لأول دينار معرب “دينار عبدالملك بن مروان”، وميداليات تذكارية للقاهرة التاريخية بمناسبة مرور ١٠٥٠ عام على تأسيسها، وميداليات تذكارية لمسار رحلة العائلة المقدسة، وميداليات تذكارية لأسرة محمد على، وعملات تذكارية لموكب نقل المومياوات الملكية من المتحف المصري إلى متحف الحضارة بالفسطاط، وميدالية تذكارية للشيخ الشعراوي.

 

عنوان متحف الفن الإسلامي: ميدان باب الخلق، شارع بورسعيد، أمام مديرية أمن القاهرة.

مواعيد العمل: يوميًا من الساعة 9 ص إلى 5 م.