“رمسيس ويصا واصف للفنون”.. منسوجات عالمية بتوقيع أهالي قرية “الحرانية”
إبداع مصري الحرانية مركز رمسيس ويصا واصف للفنون منسوجات الحرانية منسوجات يدوية
Cairo 360
في خمسينيات القرن الماضي، بدأ المهندس رمسيس ويصا واصف، حلمه اللي صنع تغيير حقيقي وكان سبب في وصول إبداعات أطفال ونساء ورجال من قرية مصرية بسيطة اسمها “الحرانية” إلى العالمية. في الوقت ده كان المهندس “ويصا”، بيشتغل مهندس معماري ورئيس قسم “العمارة وتاريخ الفن” بكلية الفنون الجميلة، تعالوا نتعرف أكتر على حلم رمسيس ويصا واصف المدهش!
“الحرانية” هي قرية صغيرة بمحافظة الجيزة، وهي أكتر مكان حس “واصف” إنه مناسب لفكرة مشروعه الفني، فقرر شراء أرض هناك في 1952، وأنشأ مركزه للفنون فيها. وتم تصميم مباني المركز على الطراز القبطي اللي بيدعم التهوية الطبيعية والاستفادة من ضوء النهار.
حلم “واصف” كان باختصار هو تعليم الأطفال في القرية الفنون، لأنه كان مؤمن إن الفن للجميع. جمع “واصف” مجموعة من أطفال القرية من أبناء الفلاحين، وعلمهم أساسيات صناعة المنسوجات عن طريق الأنوال التقليدية، وخلاهم قادرين على صناعة إبداع حقيقي من مناظر من بيئتهم.
المركز قام بتدريب عدد كبير من سيدات القرية كمان على صناعة النسيج اليدوي بشكل فني، وبالفعل خرج منهم إبداعات مدهشة سافرت العالم كله وشاركت في معارض مهمة.
بسرعة شديدة قدر “واصف” يوصل إبداعات المركز للعالمية، يعني أعمال الأطفال والسيدات دول طافت معارض فنية عالمية، ونالت العديد من الجوائز.
كل شيء في مركز “رمسيس ويصا واصف للفنون” بيتم بالأساليب القديمة، صناعة النسيج بتكون بشكل يدوي على الأنوال الخشبية، وحتى الخيوط المستخدمة فى النسيج بيتم صبغها في المركز بالأصباغ الطبيعة المستخرجة من النباتات اللي بيتم زراعتها في أرض المركز.
توفى رمسيس واصف عام 1974، لكن حلمه لسة مستمر لحد النهارده!
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
