The Definitive Guide to Living in the Capital , Cairo , Egypt

يمنى أحمد

مصدر الصورة

أوقات كتيرة بنحس إننا مش قادرين نوصل لأخر مراحل الجمال اللي في القاهرة، طبيعة المدينة مختلفة عن أي مكان عشت أو هتعيش فيه، دايمًا هتحس بالونس والجمال وبعبقها وتاريخها اللي كل مرة بنتعلم منه.. النهاردة إحنا اكتشفنا جمال من نوع آخر ممكن يميز متحف محمود خليل وحرمه، المختلف في المكان كايرو 360 قررت تسرده لك في السطور الجاية.

(1) هتحس عند دخولك المتحف إنك انتقلت إلى فرنسا، كل حاجة فيه مختلطة بريحة باريس، الألوان وطريقة تصميم المتحف اللي كان في الأصل قصر محمود خليل كلها هتعيشك في جو من الهدوء والكلاسيكية المعاصرة، وإنك رجعت للقرن الـ 19 وشوفت بعينك جزء من باريس ممزوج بأصالة القاهرة في القرن ده.

 

(2) هتلاقي كنوز فنية كتيرة. القصة بدأت لما محمود خليل، اللي تولى منصب وزير الزراعة في مصر في فترة، قرر أنه يسافر وينطلق في العالم ويعبر عن حبه للفن، ولقى إن باريس هي الأنسب لاحتضانه، سافر وأعجب بفتاة اسمها إيميلي كانت عاشقة للموسيقى والفن، تزوجها وقرر إنه يرجع معاها على القاهرة ويجمعوا سوا القطع الفنية والقماش المطرز بالرسومات واللوحات العالمية ويضعها في قصره اللي أصبح هو المتحف في الوقت الحالي. هتلاقي لوحات فان جوخ، وكلود مونيه، وبيسارو، علشان كده صعب تخرج من المتحف وأنت مش مبسوط لأنك هتشوف العالم كله هناك بعيون خليل وإيميلي.

(3) خلينا نقول لك إن المكان ده هينجح في إنه يخليك تفصل عن العالم كله لمدة، هتحس بروحه العتيقة وإنك مش عايز تغادره، بدايةً من الزرع اللي بيستقبلك على أبوابه ونهايةً بالرسومات المحدقة في وجهك ومركزة عليك ومش عارف تستوعب جمالها، هيعيشك حالة ممتازة وممكن يساعدك في أنك تنفذ عمل خاص بيك مبدع ده نتيجة الإبداع اللي فيه.

 

(4) الأهم في زيارة المتحف هو طاقة الحب اللي هتحس بيها جول فترة تواجدك فيه، ده الحب اللي بتورثه أرواح محمود خليل وزوجته في المكان، لما تبص على أي قطعة موجودة هتشوف فيها نظرات إيميلي المشعة والمصوبة ناحية زوجها وهو بيعدل القطعة دي على سبيل المثال، هتحس إنك العلاقة بينهم ماكانتش عادية لدرجة إنه مش بس يبني ليها قصر بل إن اسمها يفضل مذكور في التاريخ العمر كله، ممكن تستمد من الروح دي طاقة نور جديدة في علاقاتك كلها، مش شرط علاقتك مع شريكك أو شريكتك.. الحياة هتبقى أجمل لو قررت تشوف المتحف بالزاوية الحلوة دي.

 

(5) الفن طول عمره يكسب، بأي شكل من أشكاله وبجميع ألوانه، هتشعر هناك بقوة روح الفنان وقدرته على تجسيد الواقع والخيال في صور حية، والصور دي بتاخدك لأيام طفولتك يمكن وأيام لسه جميلة هتعيشها، علشان كده سهل تعبر عن حبك ده بحضور الورش اللي المتحف بيعملها، زي رسم البورتريه كاريكاتير وتصوير بتقنية الكولاج مع الفنان عبد العزيز الجندي، واللي موعدها 5 يونيه من 12 ظهرًا وحتى 3 ظهرًا، والدعوة فيها مجانية.

لمزيد من التفاصيل عن الورشة، اضغطوا هنا.

 

المتحف موجود في منطقة الدقي، وحصل مؤخرًا على أفضل مشروع ترميم على مستوى العالم، ويسمح لدخول الأطفال دون سن 15 عامًا مجانًا، وسعر تذكرة الدخول للطلاب 10 جنيه، وللمواطنين العاديين 30 جنيه.