The Definitive Guide to Living in the Capital , Cairo , Egypt

ناس كتير في رمضان بتقلل خروجاتها طول النهار بسبب الجو الحر والصيام وبيكون عندهم وقت كبير ممل في البيت.. رمضان يعتبر وقت مناسب لمحبي هواية القراءة إنهم يقرأوا بهدوء.. بنرشحلكم خمس كتب متنوعة تسلوا بيها صيامكم.

كتالوج الحب – غادة كريم

كتاب غادة كريم واحد من الكتب الخفيفة الممتعة إللى ممكن تقرأها في رمضان خصوصًا للستات، كتاب غادة إللي صدر قبل ده وكان بعنوان رسايل حريمي جدًا كان مناسب أكتر لشريحة السيدات المتزوجات والأمهات لكن كتالوج الحب مناسب للجميع لإنه بيناقش فكرة عن الحب بوجه عام. الكاتبة بتقول في مقدمة الكتاب “أول ما تفعله عند شراء جهاز هو قراءة كيفية تشغيله، وقبل أن تقود سيارة كل ما تحتاجه هو تعلم القيادة وكذلك قبل أن تخوض علاقة حب مع شخص من الجنس الآخر يجب أن تقرأ كتالوج الحب”..

غادة كريم شايفة إنه الحب عبارة عن مثلث من 3 أضلاع: الفهم، وصناعة الونس، والمجهود وعلشان كدة فصول الكتاب الثلاثة حملت العناوين دي وفي داخل كل فصل مجموعة من المقالات والتدوينات المكتوبة في مزيج مريح بين الفصحى والعامية.

الكتاب صادر عن دوار دون ويقع في 175 صفحة من القطع المتوسط.

استمارة 6 – خالد حبيب

كتاب استمارة ستة ده المفروض يتوزع على الشباب ببلاش قبل ما يبدأوا يشتغلوا، خصوصًا لو هيشتغلوا في القطاع الخاص.. الكتاب عبارة عن قصص ومواقف كتير من جوة مطبخ الشركات الكبيرة بينقلها لنا الإعلامي”خالد حبيب” إللى قدم برامج كتير إذاعية وتلفزيونية بجانب عمله في كتير من المناصب القيادية في الشركات الدولية. الأسلوب عامي وخفيف ومناسب لكل القراء رجالة وستات ويعتبر وجبة خفيفة مفيدة تسلي بيها صيامك. في مقدمة الكتاب بيقول الكاتب “كنت فاكر وأنا بكتب الكتاب ده إنى هقدم تجارب وخبرات في علم الإدارة والبيزنس والعلاقات وبس. لكن لقيتني بكتشف نفسي مع كل حكاية وكل موقف مر بيا في الحياة.. وبسترجع صور ومعاني أنا نفسي وقعت فيها أو عملتها”.

مر مثل القهوة حلو مثل الشوكولا- ميرنا الهلباوي

من الروايات الأكثر مبيعًا في 2018 واحتلت المركز الأول في فيرجن طول الشهر إللي فات.. الرواية تعتبر الأولى للكاتبة ومذيعة الراديو ميرنا الهلباوي وإللي كتير من القراءة حسوا إنها بتنتمي لأدب السيرة الذاتية أو أدب الرحلات بشكل كبير لإنه الكاتبة كتبت فيها عن رحلاتها وعن مواقف عاشتها مع تغيير أسماء الأشخاص. الرواية لا تخلو من المشاعر الإنسانية الصادقة والكثير من الحكايات الملهمة  ومنها:

“معجزة حقيقية عندما تدرك أن بداخلك مشاعر وأحساسيس لم تختبرها بعد، بعد كل هذه السنوات، وكل هذا الوقت ما زال هناك جزء خفي فيك لم يظهر ولم تشعر به، يتسلل إلى عروقك على الرغم من كل ما مررت به في حياتك”.

ثرثرة فوق الكنبة – أحمد أبوالنصر

كتاب ثرثرة فوق الكنبة للكاتب أحمد أبو النصر هو عبارة  مجموعة من النصوص الرومانسية القصيرة الحالمة باللغة الفصحى وهو مناسب أكتر للبنات.. من مميزات الكتاب إنه منفصل يعني تقدر تقرأ من أي مكان تحبه وتقدر ترجع ليه كل فترة من غير ما تحس بلخبطة. الكتاب من إصدارات دار اكتب وهو عبارة عن 190 صفحة من القطع المتوسط.

“لا تبالي إن صرت هشًا حين تحب، فبعض من الهشاشة واللين والضعف الذكي وقليل من القوة والصرامة وكثير من التسامح والغفران.. تصنع الإنسانية السليمة”.

“كل الذين نحبهم لو رأونا بنفس العين التي نراهم بها لربما أحبونا أضعاف ما نحبهم”.

أخرج في موعد مع فتاة تحب الكتابة – اختيار وترجمة محمد الضبع

إحنا حبينا الكتاب ده في رمضان لإنه كتاب فيه مشاعر جميلة ومحتاج حالة من السكون والهدوء النفسي وممكن تقرأ فيه زي ما تحب.. ممكن تفتح أي نص وتبدأ تقراه على طول وتسيب الكتاب وترجع ليه تاني ومش هتحس بأي مشكلة..الكتاب عبارة عن نصوص ومقالات ومقابلات مترجمة من اختيار المترجم والمدون اليمني محمد الضبع وهو صادرعن دار نشر الكرمة، جدير بالذكر إنه النصوص دي حققت انتشار ونجاح كبير لما نشرها المترجم أولا في مدونته على تمبلر “معطف فوق سرير العالم”. النصوص المترجمة معظمها عن الكتابة والحب والحياة واختياراها كان موفق جدًا وترجمتها أكثر من رائعة واسم الكتاب ” أخرج مع فتاة تحب الكتابة” هو عنوان لنص من نصوص الكتاب.