The Definitive Guide to Living in the Capital , Cairo , Egypt

كل يوم بنكتشف نموذج مصري مميز في أكتر من مجال عالمي، وأحدث النماذج دي هي الممثلة المصرية “شيرين أحمد”، واللي بتشارك بدور البطولة في المسرحية الغنائية الاستعراضية “سيدتي الجميلة”، المقتبسة من مسرحية بيجماليون لبرنارد شو، على مسارح برودواي، وبكده هتكون “شيرين” هي أول ممثلة من أصل مصرى عربي تلعب دور كبير في واحدة من مسرحيات برودواي.

الصحافة العالمية مهتمة جدًا بـ “شيرين” الفترة دي، باعتبارها أول ممثلة عربية تغير الصورة النمطية عن الفنانين اللي جايين من الشرق الأوسط، واللي غالبًا بتكون أدوارهم في الأعمال العالمية هي الشخصيات العربية أو الإرهابية.

بتقول صحيفة “واشنطن بوست” عن “شيرين” إن والدها هو طارق أحمد، وهو مهاجر مصري، بيمتلك محل للمجوهرات في ولاية ماريلاند، ووالدتها هي ساندرا، وهي أمريكية الأصل، وبتشتغل مدرسة للغة الإنجليزية.

“شيرين” درست حقوق الإنسان فى جامعة تشارلز في براغ، بالجمهورية التشيكية، وهي حاصلة على بكالوريوس العلوم فى علم الاجتماع والأنثروبولوجيا مع التركيز على العدالة الجنائية من جامعة تاوسون، وخلال دراستها في الجامعة، اتدربت فى نظام المحاكم، وخاصة فى قضايا الصحة العقلية، لكن شغفها بالفن خلاها تحصل على دروس صوت ورقص وتمثيل فى معاهد متخصصة.

رحلة “شيرين” مع عالم الفن

دخلت “شيرين” عالم المسرح لما قامت بالعديد من الاختبارات للعمل فى المسارح الغنائية والاستعراضية، وكمان عملت اختبار علشان تشتغل مغنية على سفينة رحلات بحرية سياحية، وغنت “شيرين” في الاختبار ده أغاني من مسرحيات برودواي، وبالفعل تم قبولها، ووقعت عقد للعمل لمدة سنتين على السفينة دي، وكانت بتغني أغاني سيلين ديون وماريا كاري وتينا تيرنر.

بعدها تم قبولها لتمثيل دور إيليزا دوليتل، فى عرض جديد لمسرحية “سيدتي الجميلة” من إنتاج مسرح لينكولن سنتر وإخراج بارليت شير، لكنها ماكنتش البطلو، ولكنها كانت في الوقت ده البديلة للفنانة لورا بنتاني لأكثر من سنة، اتدربت خلالها يوميًا على أداء دورها، قبل ماتجيلها الفرصة وتقف بنفسها علي خشبة مسرح برودواي علشان تؤدي الدور ده باعتبارها البطلة الرئيسية.

وبسبب تميزها ونجاحها في أداء الدور، وفي ديسمبر 2019، بعد انتهاء العرض المسرحي على مسارح برودواي، اختارت فرقة مسرح لينكولن سنتر “شيرين” علشان تلعب دور إيليزا دوليتل في جولة لعرض مسرحية “سيدتي الجميلة” علي مسارح أمريكا، وهي الفرصة اللي فتحت لـ “شيرين” أبواب النجومية من أوسع أبوابها، وخلتها أول فنانة مصرية تقدم بطولة مطلقة لعمل في برودواي.

نتمنى نشوف “شيرين أحمد” قريب في عمل فني مصري.