The Definitive Guide to Living in the Capital , Cairo , Egypt

موقع جوجل بيحتفل النهاردة بذكرى ميلاد النجمة المصرية الراحلة مديحة كامل اللي اتولدت في 3 أغسطس من العام 1948 وسابت عالمنا سنة 1997.

والنجمة الجميلة اتولدت في الإسكندرية، وانتقلت للعيش في القاهرة من سنة 1962، ودرست في كلية الآداب بجامعة عين شمس، وبعد التخرج عملت لفترة في مجال عروض الأزياء وبعدين اشتغلت في مجال التمثيل من خلال كتير من الأدوار الصغيرة لحد ما حصلت على دور البطولة في فيلم (30 يوم في السجن).

بعدها اختفت حوالي سنتين ثم رجعت من جديد تمثل في مصر ولبنان في أدوار ماحققتلهاش الشهرة الواسعة ولكن حققت لها انتشار كبير، ولعبت أدوار البطولة الثانية في أفلام كثيرة، لحد ما جاتلها الفرصة للبطولة المطلقة مع المخرج كمال الشيخ في فيلم “الصعود إلى الهاوية” مع الفنان محمود ياسين.

وأدت مديحة في الفيلم ده دور جاسوسة بتشتغل لصالح إسرائيل، وفي الفيلم عبارة خالدة للفنان محمود ياسين بيقولها لمديحة كامل بعد القبض عليها وإعادتها للبلاد، والجملة هي: “هي دي مصر يا عبلة “.

وحقق دور عبلة نجومية كبيرة لمديحة كامل وقتها، وفتح أمامها أبواب بطولات نسائية مطلقة مع نجوم كبار زي فيلم شوارع من نار من النجم الراحل نور الشريف وبيحكي عن فترة الاحتلال الإنجليزي لمصر.

كمان ليها دور مهم في الفيلم الكوميدي “أذكياء  لكن أغبياء” مع النجمين عادل إمام وسمير غانم، والنجم الراحل رشدي أباظة.

معاناة مع المرض

عانت مديحة كامل من مرض القلب طول حياتها، وفي سنة 1975 اتصابت بجلطة أثناء تصويرها مسلسل الأفعى، إلا أن متاعبها الصحية الجدية بدأت قبل وفاتها بسنة، وفي الفترة دي فضلت طريحة الفراش في مستشفى مصطفى محمود لمدة عشر أشهر بسبب ضعف عضلة القلب و تراكم المياه على الرئة بشكل مستمر مما أستدعى وجودها في المستشفى لفترة طويلة.

اتوفت في منزلها في 13 يناير 1997 الموافق الرابع من شهر رمضان بعد ما صلت صلاة الفجر جماعة مع بنتها وزوج بنتها، وبعدها راحت تنام، ومن وقتها مصحيتش تاني.

جدير بالذكر أنها ماظهرتش إعلاميًا بعد اعتزالها الفن إلا في مقابلة في برنامج “حوار صريح جدًا” سنة 1995، ولكن تم منع عرض الحلقة بسبب أنها شنت هجوم قاسي جدًا على الوسط الفني.