The Definitive Guide to Living in the Capital , Cairo , Egypt

من وقت ظهور فيروس “كورونا” المستجد، والقعدة في البيت أفضل وأحسن لكم ولأهلكم، وإحنا في كايرو 360 بنشجعكم تقعدوا في البيت وماتنزلوش، وعلشان القعدة مملة وممكن تتضايقوا منها، هنعرفكم على 5 مواقع الكترونية تقدروا من خلالها تحصلوا على دورات في مختلف المجالات وكمان تاخدوا شهادات مجانًا.

إدراك

هي منصة إلكترونية متخصصة للتدريبات الجماعية المفتوحة، وأسستها مؤسسة الملكة رانيا للتعليم والتنمية، وهتلاقوا عليها عشرات التدريبات والدورات في مختلف المجالات واللي بيقدمها متخصصين من كل أنحاء الوطن العربي، وتقدروا تزوروها من هنا.

رواق

هي منصة تعليمية بتهتم بتقديم مواد دراسية أكاديمية مجانية باللغة العربية في كل المجالات، وبيقدمها أكاديميين متميزيين، والدراسة باللغة العربية، وتقدروا تزوروا موقعهم الالكتروني من هنا.

خدمة جوجل التعليمية

أكاديمية جوجل للتدريب هي واحدة من أهم المواقع اللي لازم تلجأ لها في التعليم عن بعد، وبيقدموا دورات متنوعة مجانية لخدمة أنشطتكم التجارية أو علشان تتعلموا مهارات جديدة، وتقدروا تشاركوا في دورات كاملة أو تخصصات محددة حسب احتياجاتكم، وتقدروا تتعرفوا على الدوارت اللي بيقدموها من هنا.

المنتور. نت

هي شبكة لتنمية المهارات والقدرات في الشرق الأوسط وإفريقيا، وكمان فيها  مكتبة فيديو للدورات التدريبية الحصرية وحوارات تحفيزية وكلمات مصورة للخبراء والمتخصصين باللغتين العربية والإنجليزية، وتقدروا تشاركوا في دوراتهم التدريبية من هنا. وبعض الدورات مجانية، والبعض الآخر بأسعار رمزية.

فرصة

بتعتبر أكبر منصة للفرص التعليمية والتدريبية في الشرق الأوسط، وبتوفر فرص تدريب متكاملة للشباب، وغير الدورات كمان عندهم منح دراسية وزمالات وفرص تشبيك وحضور مؤتمرات ومنح مالية وغيرهم، وتقدروا تتعرفوا عليهم أكتر من خلال الضغط هنا.