The Definitive Guide to Living in the Capital , Cairo , Egypt

ظافر العابدين فنان تونسي قدر ومن أول مشهد له في مسلسل “فيرتيجو” أنه يخطف قلوب كتير من المصريين والعرب، ده غير طبعًا شعبيته بين البنات اللي جعلته يبقى واحد من جانات الدراما المصرية.

شعبية ظافر بدأت بعد الفرصة اللي وفرها له مسلسل فيرتيجو، وهند صبري كانت من أكتر المتحمسين لأنه يكون موجود في الدراما المصرية، بعدها قدر يشق طريقه، وفي رمضان 2017 ظافر بيلعب في مسلسل “حلاوة الدنيا” دور سليم اللي بيحب هند صبري وخاطبها وعلى وش جواز.

قابلنا ظافر العابدين ودردشنا معاه عن القاهرة والأكل والفن.

 

كلمنا عن أكتر بلاد بتحبها

فيه 3 بلاد لهم مكانة خاصة في قلبي ما أقدرش أنكرها، وهما القاهرة ولندن وتونس، الأولى بسبب أنها مكان شغلي وبتواجد فيها معظم شهور السنة، والثانية فيها زوجتي وبنتي، والثالثة هي وطني.

طيب وعلاقتك بمصر؟

عندي أصحاب كتير في مصر، وبحب الأكل المصري جدًا، وهقول لك حاجة مش كتير يعرفوها عني، أنا ممكن أروح إمبابة مخصوص علشان أكل من عند البرنس، وفي الزمالك بحب الأكل البيتي اللي بيقدمه مطعم كايرو إن.

وبصفة عامة بحب أي مكان في الزمالك على النيل، وأكتر أكلة مصرية بعشقها هي الكشري وبروح وسط البلد مخصوص علشان استمتع بيه.

 

كلمنا عن دور سليم في حلاوة الدنيا

أنا سعيد وفرحان أنه تم اختياري للعمل في المسلسل ده مع هند صبري والمخرج حسين المنباوي والمنتج محمد مشيش علشان ألعب دور سليم، وهو شخص عنده علاقة غريبة جدًا مع أبوه وبيظهر ده في الحلقات الأولى قبل ما تبتدي علاقته بخطيبته اللي بيطلع عندها سرطان وهي طبعًا هند صبري.

ودورك في كراميل؟

بيعرض ليا كمان السنة دي مسلسل “كراميل”، وهو مسلسل لبناني نوعه رومانسي كوميدى، وقصته غريبة شوية، بيدور عن بنت بتاكل “حبة كراميل” فى ظروف معينة فتتغير حياتها، وبتظهر لها قدرات خاصة بتخليها تسمع كل اللي بيفكر فيه الرجالة، وكل اللي بيدور في أذهانهم من غير ما يتكلموا، ودي فكرة لطيفة بتسبب مواقف كوميدية كتير.

وبقدم في العمل ده شخصية رجل أعمال لأب مصرى وأم لبنانية، وبتجمعه علاقة بالشخصية اللي بتقوم بدور البطولة في المسلسل وهي ماجى بوغصن.

انتهى حوارنا مع ظافر العابدين، اللي بيتمنى أدواره تعجب كل سكان القاهرة ومصر والعالم العربي، وبنتمنى له كل النجاح.. والتميز.

 

لمعلوماتك

ظافر العابدين بدأ حياته كلاعب كرة قدم محترف، لحد ما أصبح عمره 23 سنة واتعرض لإصابة خلته يبتعد عن الملاعب سنتين، بعدها بدأ دراسته في علوم الكمبيوتر، وفي نفس الوقت كان بيشتغل عارض أزياء في وكالة متروبوليتان (Metropolitan) الباريسية.

ظافر بيتكلم العربية والفرنسية والانجليزية والإيطالية.