عاش هنا… لوحة بـ “كيو آر كود” على كل بيت عاش فيه مبدع مصري
QR القاهرة حماية التراث شخصيات عامة شخصيات لها تاريخ عاش هنا عمارات الفنانين كل مبنى أثري متحف كيو آر مشروع عاش هنا مصر
Cairo 360
الصورة الرئيسية لعمارة الإيموبيليا في وسط البلد.. تصوير: فتحية السيسي
نجح مشروع “عاش هنا” اللي بقى له حوالي سنة واللي بينفذه الجهاز القومي للتنسيق الحضاري، وهو خاص بوضع لافتات على منازل الفنانين والمبدعين والشعراء والسياسيين والأدباء والفلاسفة وأساتذة التاريخ والعلماء وغيرهم زي ما عملوا في بيت بطرس بطرس غالي وسيد حجاب. واللافتات دي هتتحط على المباني للتعريف بالشخصيات اللي عاشت فيها، ودي تعتبر خطوة كبيرة جدًا لتخليد ذكرى كل من أثر في تاريخ مصر وساب بصمة باعتباره جزء لا يتجزأ من ذاكرة مصر.
أهمية المشروع ده إنه بيوثق للمباني اللي عاش فيها أهم النجوم المصريين في كل المجالات، زي مثلًا عمار الإيموبيليا في وسط البلد، واللي عاش فيها أهم نجوم السينما والموسيقى في مصر.
وهيكون فيه طريقة متطورة مرتبطة باللوحات دي وهي باستخدام كود QR، واللى يخليك تقدر تدخل لقاعدة بيانات البيت والشخصيات اللى عاشت فيه، وهيكون مكتوب على اللوحة تاريخ ميلاد ووفاة كل فنان وإزاي أثر في تاريخ مصر.
وتطبيق QR ده من التطبيقات التكنولوجية، وبيتم استخدامه عن طريق الهواتف الذكية، فكل لافتة هتتحط، هتكون مجهزة بطريقة متطورة بحيث أنك لما تحط الموبايل عليها بعد تنزيل التطبيق على بوابة العمارة اللى سكنها كل فنان، هتشرح هي بالتفاصيل كل أعمال كل فنان وصورهم الشخصية، والمشروع ده يعتبر توثيق مهم للأجيال الجاية اللي ماتعرفش حاجة عن تاريخها أو عن شخصيات مهمة أثرت في الماضي بس اتنسوا حاليًا.
وعلشان تتعرف على كل المعلومات عن الشخصية العامة اللي عاشت في المكان ده بتحتاج تحمل على تليفونك أي برنامج QR Reader وبعدها بتعمل سكان للكود اللي موجود على اللوحة وده هيدخلك لقاعدة بيانات ضخمة فيها كل المعلومات اللي محتاج تعرفها عن الشخص ده.
